Офатҳои табиӣ дар Америка соли 2022 миллионҳо одамонро бе сарпаноҳ гузоштанд

ДУШАНБЕ, 16.02.2023 /АМИТ «Ховар»/. Соли 2022 дар Штатҳои Муттаҳидаи Америка миллионҳо нафар аз тӯфон, обхезӣ ва сӯхтор зарар дида, ба иқтисод дар ҳаҷми миллиард доллар зарар расидааст, иттилоъ медиҳад АБИ «Казинформ» бо истинод ба NBC News.

Мувофиқи иттилои Бюрои барӯйхатгирии аҳолӣ, офатҳои табиӣ дар Штатҳои Муттаҳида тақрибан 3,4 миллион нафарро маҷбур сохтанд, ки хонаҳои худро тарк кунанд.

Тақрибан 40% давоми ҳафта ба хонаҳои худ баргаштанд, тақрибан 16% ба ҷойҳои қаблии истиқомати худ барнагаштанд ва 12% барои беш аз 6 моҳ кӯчонида шуданд.

Шумораи зиёди зарардидагон дар штатҳои Флорида — 888 ҳазор, Калифорния — 387 ҳазор, Луизиана — 368 ҳазор, Техас — 292 ҳазор, Ню — Ҷерси — 108 ҳазор ва Массачусетс — 105 ҳазор нафар буданд.

Маъмурияти миллии таҳқиқотии уқёнусӣ ва фазоӣ баён кард, ки ҳар яке аз 18 ҳодисаи фавқулодаи обу ҳаво ба қадри 1 миллиард доллар зарари иқтисодӣ расонидааст.

Коршиносони иқлим ҳушдор медиҳанд, ки ҳангоми баланд шудани ҳарорати ҷаҳонӣ офатҳои шадиди обу ҳаворо интизор шудан зарур меояд.

Азиза ДАДАБОЕВА,
АМИТ «Ховар»

АКС: Ricardo Arduengo / AFP via Getty Images