Ҷоми «Formula55». Дар Душанбе Мусобиқаи ҷумҳуриявӣ оид ба тенниси рӯи миз баргузор шуд

ДУШАНБЕ, 24.02.2023 /АМИТ «Ховар»/. Аз 18 то 21 феврал дар толори Мактаби махсуси варзишии рақами 5-и шаҳри Душанбе Мусобиқаи дуюми ҷумҳуриявӣ оид ба тенниси рӯи миз барои дарёфти Ҷоми «Formula55» баргузор гардид. Дар ин хусус ба мухбири АМИТ «Ховар» дар ширкати «Formula55» хабар доданд.

Аз рӯи натиҷаи мусобиқа байни бонувон дастаи шаҳри Кӯлоб сазовори ҷойи аввал гардида, дастаи Душанбе-1 – зинаи дуюм ва дастаи шаҳри Ҳисор мақоми сеюмро ба даст оварданд. Байни мардон дастаҳои Душанбе-1 ба гирифтани ҷойи якум, шаҳри Кӯлоб – ҷойи дуюм ва Душанбе-2 – ҷойи сеюм шарафёб шуданд.

Ҷоизадорони мусобиқа дар қароргоҳи асосии ширкати «Formula55» бо медалу ифтихорнома ва туҳфаҳои пулӣ қадрдонӣ гардиданд.

«Formula55» тасмим гирифтааст, ки баъд аз тенниси рӯи миз 25 феврал мусобиқаи волейболро байни дастаҳои мардона ва занона оғоз намояд.

Тазаккур бояд дод, ки мусобиқаи баргузоршуда бо иштироки беҳтарин теннисбозон аз ҳисоби бонувон ва мардон доир гардид. Рақобатҳо ба таври инфиродӣ ва даставӣ баргузор шуданд.

Бояд гуфт, ки «Formula55» бо мақсади дастгирии федератсияҳои варзишии мамлакат, рушди тарбияи ҷисмонӣ ва ҳавасмандгардонии варзишгарон якчанд лоиҳаҳоро амалӣ мегардонад, ки баргузории «FORMULA55 CUP» низ аз ҷумлаи ин иқдом маҳсуб мешавад.

АКС аз ширкати «Formula55»