Раёсати Донишгоҳи давлатии Данғара соли 2022 барои гузаронидани таҳқиқоти илмӣ 15 шартномаи ҳамкорӣ ба имзо расонид

ДУШАНБЕ, 12.02.2023. /АМИТ «Ховар»/. Раёсати Донишгоҳи давлатии Данғара соли 2022 барои гузаронидани таҳқиқоти илмӣ бо беш аз 15 шарики минтақавӣ шартномаи ҳамкорӣ ба имзо расонид. Дар ин хусус зимни нишасти матбуотӣ дар Донишгоҳи давлатии Данғара оид ба ҷамъбасти фаъолияти илмӣ-таълимӣ, робитаҳои хориҷӣ ва иқтисодиву ободонӣ дар соли 2022 иттилоъ дода шуд.

Иброз гардид, ки ҳайати омӯзгорон ва профессорони Донишгоҳ ҷанбаҳои амалии корҳои илмии анҷомдодаи худро дар корхонаҳои саноатӣ ва марказҳо, аз ҷумла, дар Маркази ташхиси бехатарии озуқавории ноҳияи Данғара, Озмоишгоҳи санҷиши байторӣ, Кооперативи истеҳсолии “Раҳмонҷон”-и ноҳияи Данғара, Минтақаи озоди иқтисодии Данғара, ҶСП “Ҷунтай-Данғара синсилу текстил”, Хоҷагии деҳқонии “Баҳористон”-и ноҳияи Данғара, ҶДММ “Шири Данғара” ва ҶДММ “Фармтекс”-и ноҳияи Данғара аз ташхис мегузаронанд.

Зимни нишасти матбуотӣ гуфта шуд, ки дар Донишгоҳи давлатии Данғара чунин озмоишгоҳҳо ва марказҳои таълимӣ-инноватсионӣ: Маркази озмоишгоҳии таълимӣ-илмӣ ва инноватсионии «Технологияи дизайн ва рушди соҳибкорӣ», Маркази озмоишӣ ва тадқиқотӣ дар самти кишоварзӣ (гармхона), Маркази таълимӣ-омӯзишии мӯди «Чаманоро» ва Маркази таълимӣ-омӯзишии лоиҳаи рушди таҳсилоти олии «Рушди ҳамкории шабакавӣ байни донишгоҳҳо дар самти баланд бардоштани сифати таълим ва рушди касбии ҳайати омӯзгорон» амал мекунанд.

АКС: Донишгоҳи давлатии Данғара