ГИМНАСТИКАИ БАДЕӢ. Варзишгарони навраси тоҷик аз Тошканд бо 14 медали тилло баргаштанд
ДУШАНБЕ, 14.03.2023 /АМИТ «Ховар»/. Гимнастҳои ҷавони тоҷик дар Мусобиқаи кушоди байналмилалӣ оид ба гимнастикаи бадеии «Ситораҳои булӯр», ки дар шаҳри Тошканд баргузор шуд, иштирок намуда, 14 медали тилло ба даст оварданд. Дар ин хусус АМИТ «Ховар» бо истинод ба сармураббии дастаи гимнастикаи бадеии Мактаби варзишии захираҳои олимпии шаҳри Душанбе оид ба гимнастикаи бадеӣ Миҷгона Шарифова хабар медиҳад.
Дар ин мусобиқа Марям Шукурова, Роҳила Тоҷиддинова, Ариана Сафарова, Елизавета Стрелникова, Бибиосия Шарипова, Шукрона Саидова, Муноҷот Юлчиева, Зайнаб Қодирӣ, София Грудаева, Ясмина Ҳамидова, София Турсунзода, Азиза Нурализода, Ясина Паллаева, Симин Ҳусейнова бо медалҳои тилло мукофотонида шуданд.
Инчунин дар мусобиқа беш аз 200 варзишгар аз Узбекистон, Қазоқистон, Тоҷикистон ва Қирғизистон иштирок доштанд. Бинобар он ки ҳамаи аъзои дастаи мо- аз 7 то 13-сола соҳиби ҷоиза гардиданд, ба онҳо Ҷоми даставии мусобиқа низ дода шуд.
Ин аввалин муваффақияти гимнастҳои ҷавони Тоҷикистон нест. Қаблан онҳо дар мусобиқаҳои мухталифи байналмилалӣ оид ба гимнастикаи бадеӣ, аз ҷумла дар Мусобиқаи байналмилалии гимнастикаи бадеии «East Cup Stars Olympic» («Ҷоми Шарқ – ситораҳои олимпӣ») як медали тилло, панҷ нуқра ва чор биринҷӣ ба даст оварда, соҳиби Ҷоми даставии мусобиқа гардиданд. Ҳамчунин дар Мусобиқаи 6-уми байналмилалӣ оид ба гимнастикаи бадеӣ дар шаҳри Актауи Қазоқистон 5 медали биринҷӣ ба даст оварданд. Инчунин дар Мусобиқаи байналмилалии «Гимнастикаи бадеӣ — Талош 2022» низ соҳиби ҷоиза шуданд.
Сармуррабии дастаи гимнастҳои Тоҷикистон Миҷгона Шарифова иброз дошт, ки «дар гурӯҳи мо духтарони синни гуногун ва гурӯҳҳои омехта варзиш мекунанд. Дар гимнастика маҳдудияти дақиқи синну сол нест».
Имрӯзҳо дар мамлакат бо дастгирии давлату Ҳукумат барои гимнастикаи бадеӣ мушкилот вуҷуд надорад. Агар 10 сол қабл гимнастҳо дар толорҳои хурду бе шароити зарурӣ тамрин мекарданд, ҳоло дар толори барҳавою равшани мактаби мазкур машқ карда, ба муваффақияти беназири варзишӣ ноил шуда, Парчами Тоҷикистонро дар арсаи байналмилалӣ баланд мебардоранд.
Бояд гуфт, ки Миҷгона Шарифова аз хурдсолӣ, яъне аз 4-солагӣ ба гимнастикаи бадеӣ машғул гардида, нахуст дар шаҳри Москваи Федератсияи Русия тамрин кардааст. Сипас ба Тоҷикистон баргашта, аз 12-солагӣ дар Душанбе ба гимнастикаи бадеӣ машғул мебошад. Дорандаи чандин ҷоизаву медалҳои байналмилалист.
Ёдовар мешавем, ки гимнастикаи бадеӣ аз соли 1984 инҷониб ба намудҳои олимпӣ дохил мешавад. Гимнастикаи бадеӣ варзишест, ки аз иҷрои машқҳои гуногуни гимнастикӣ, рақсӣ ва унсурҳои мусиқӣ бидуни ашё, инчунин бо ашё (гурз, тӯб, ресмон, ҳалқа) иборат аст. Ин варзиш дар Тоҷикистон низ маъмул буда, асосгузори он Роза Баринова мебошад.
София ШОИК,
АМИТ «Ховар»
АКС: АМИТ «Ховар»
Варзишгар аз Тоҷикистон Абдулмаҷид Кудиев дар Узбекистон медали тиллоро сазовор шуд
ФУТБОЛ. Дастаи олимпии Тоҷикистон (U-23) бо ҳамсолони худ аз Чин бозиҳои дӯстона баргузор мекунад
Ғолибони Чемпионати Осиё оид ба бокс қадрдонӣ карда шуданд
Ҳайати дастаи мунтахаби Тоҷикистон оид ба футбол барои бозиҳои дӯстона бо тими мунтахаби Ҳиндустон муайян гардид
ФУТБОЛ. Дастаи мунтахаби Тоҷикистон бо тими мунтахаби Ҳиндустон бозиҳои дӯстона анҷом медиҳад
Дар Ёвон гулгашти фарҳангию фароғатӣ бо муҷассамаи «Рамзи футбол» ба истифода дода шуд
Дар деҳаи ба номи Иброҳим Бозорови шаҳри Турсунзода бахшида ба Рӯзи ҷаҳонии футбол майдони варзишии «Ҳумо Арена» ифтитоҳ ёфт
Бахшида ба Рӯзи ҷаҳонии футбол Фестивали бошукуҳи футбол баргузор гардид
Дар Душанбе Варзишгоҳи миллӣ ба истифода дода мешавад
Хислатҳои неки роҳбарии Рустами Эмомалӣ -ҳадафмандӣ, таваҷҷуҳ ба таҷрибаҳои беназир, эҳтиром ба одамон ва муоширати сатҳи баланд
Эмомалӣ Раҳмон: «Футбол имрӯз на танҳо як намуди варзиш, балки омили муҳими таҳкими дӯстӣ, ҳамдигарфаҳмӣ ва ҳамбастагии халқҳо гардидааст»
Дар шаҳри Оснабрюки Олмон бахшида ба Рӯзи ҷаҳонии футбол мусобиқа баргузор гардид
