НАВРӮЗ-ПАДИДАИ АСИЛИ ФАРҲАНГИ МИЛЛӢ. Дар Хадамоти иҷро ҳамоиши идона доир шуд

ДУШАНБЕ, 18.03.2023. /АМИТ «Ховар»/. Дар Хадамоти иҷрои назди Ҳукумати Ҷумҳурии Тоҷикистон бахшида ба Ҷашни байналмилалии  Наврӯз ҳамоиши идона баргузор гардид, ки дар он роҳбарият ва кормандони Хадамот, инчунин кормандони Иттифоқи нависандагони Тоҷикистон  иштирок намуданд.  Дар ин хусус ба АМИТ «Ховар» дар Хадамоти мазкур хабар доданд.

Иброз гардид, ки Наврӯз яке аз маҳбубтарин ҷашнҳои таърихӣ ва фарҳангии миллати тоҷик буда, таърихи беш аз шашҳазорсола дорад. Дар даврони истиқлоли давлатӣ  ҷашну ойинҳои миллӣ ва арзишҳои фарҳангие, ки давоми асрҳо ягонагии маънавии мардумро ҳифз мекарданд, аз қабили Наврӯз, Меҳргон, Сада, Фалак,  Шашмақом, чакан, атласу адрас эҳё гардиданд.

Тазаккур дода шуд, ки ҳоло Наврӯзи фархундаро халқу миллатҳои гуногун ҷашн мегиранд, ки ин аз арзиши умумибашарӣ ва асолати тамаддунсозии мо, тоҷикон башорат медиҳад.

Иштирокчиён дар оростани дастархони наврӯзии ҳафтсину ҳафтшин, пухтани суманак, хони наврӯзӣ маҳорати хуб нишон доданд. Ҳамзамон маҳфили шеър бо иштироки шоирону нависандагон барпо гардида, хотири иштирокчиёнро шод намуд.

АКС: Хадамоти иҷрои назди Ҳукумати Ҷумҳурии Тоҷикистон