300 миллион нафар дар ҷаҳон бинобар зеҳни сунъӣ метавонад аз кор маҳрум шавад

ДУШАНБЕ, 02.04.2023 /АМИТ «Ховар»/. Ба ақидаи иқтисоддонҳои Goldman Sachs, тақрибан 300 миллион одам дар натиҷаи автоматикунонии вазифаҳои худ бо истифода аз зеҳни сунъӣ, ки платформаҳое, ба монанди ChatGPT-ро ба вуҷуд овардаанд, бо хатари аз даст додани кор дар саросари ҷаҳон рӯ ба рӯ аст. Тавре АМИТ «Ховар» иттилоъ медиҳад, дар ин хусус АБИ «Казинформ» бо истинод ба CNN хабар додааст.

Дар гузорише, ки рӯзи якшанбе нашр шудааст, коршиносон пешгӯӣ мекунанд, ки 18% ҷойи кор дар саросари ҷаҳон метавонад компютерӣ карда шавад, ки таъсири он дар кишварҳои пешрафта назар ба бозорҳои рӯ ба тараққӣ бештар ба назар мерасад.

Мувофиқи гуфтаи иқтисоддонҳо, интизор меравад, ки кормандони маъмурӣ ва ҳуқуқшиносон дар муқоиса бо онҳое, ки дар корҳои сохтмонӣ ва таъмир берун аз бино кор мекунанд, бештар зарар хоҳанд дид.

Ба арзёбии Goldman Sachs, дар ШМА ва Аврупо тақрибан аз се ду ҳиссаи ҷойи кор ба ин ё он дараҷа ба автоматикунонии зеҳни сунъӣ дучор мегардад. Инчунин таъкид карда мешавад, ки то чоряки вазифаҳои ҷойи кори муайян метавонад пурра аз ҷониби зеҳни сунъӣ иҷро карда шавад.

Агар зеҳни сунъии тавлидӣ вазифаҳои эълоншударо иҷро кунад, бозори меҳнат метавонад ба нооромиҳои назаррас дучор ояд. Ин истилоҳ ба технологияи асоси ChatGPT, чат-бот, ки ҷаҳонро тасхир  мекунад, тааллуқ дорад.

Ба қавли онҳо, татбиқи густурдаи зеҳни сунъӣ метавонад дар ниҳоят ҳосилнокии меҳнатро афзоиш диҳад ва ММД-и ҷаҳониро дар тӯли 10 сол ҳамасола 7% афзоиш диҳад.

Муҳаққиқон иброз намуданд, ки зеҳни сунъӣ аллакай аз 25 то 50 фоизи сарбории кори коргаронро дар Америка иҷро карда метавонад, ки фаъолияти онҳоро метавон автоматӣ кард.

Азиза ИКРОМ,
АМИТ «Ховар»

АКС аз манбаъҳои боз