«CAFA NATIONS CUP 2023». Дастаи мунтахаби миллии Тоҷикистон бозии якуми худро бо дастаи Туркманистон анҷом медиҳад

ДУШАНБЕ, 27.04.2023 /АМИТ «Ховар»/. Тақвими бозиҳои мусобиқаи «CAFA Nations Cup 2023», ки аз 10 то 20 июн таҳти сарпарастии Ассотсиатсияи футболи Осиёи Марказӣ баргузор мешавад, муайян карда шуд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.  

Аз рӯи натиҷаи қуръакашии мусобиқот дастаи мунтахаби Тоҷикистон дар гурӯҳи «А» бо дастаҳои Узбекистон, Туркманистон ва Уммон ҷойгир шуд. Бозиҳо дар ин чаҳоргона дар Тошканд баргузор мешаванд.

Дастаи мунтахаби Тоҷикистон нахустин бозии худро дар Ҷоми миллатҳои Ассотсиатсияи футболи Осиёи Марказӣ 11 июн бо дастаи миллии Туркманистон анҷом медиҳад.

Дар даври дуюм 14 июн дастаи мо бо Уммон бозӣ мекунад. Дар даври ниҳоии марҳилаи гурӯҳӣ 17 июн дастаи миллии Тоҷикистон бо дастаи мунтахаби Узбекистон вомехӯрад.

Бар асоси низомномаи Ҷоми миллатҳои CAFA, дар марҳилаи гурӯҳӣ бозиҳо аз рӯи системаи даврӣ дар як марҳила баргузор мешаванд. Сипас, ғолибони гурӯҳҳо дар финал вомехӯранд. Дастаҳое, ки дар гурӯҳҳои худ ҷойи дуюмро мегиранд, барои зинаи сеюм мубориза мебаранд.

Ҷоми миллатҳои Ассотсиатсияи футболи Осиёи Марказӣ 

Гурӯҳи «А»

Узбекистон (мизбони гурӯҳ)

ТОҶИКИСТОН

Туркманистон

Уммон

Даври 1
11 июн (якшанбе) 

ТОҶИКИСТОН – Туркманистон

Узбекистон – Уммон

Даври 2
14 июн (чоршанбе) 

Уммон – ТОҶИКИСТОН

Туркманистон – Узбекистон

Даври 3
17 июн (шанбе)

Узбекистон – ТОҶИКИСТОН

Туркманистон – Уммон

АКС: Федератсияи футболи Тоҷикистон