МАФКУРАИ АСРИМИЁНАГӢ. Дар Афғонистон барои занон кор дар ниҳодҳои СММ-ро манъ намуданд
![](https://khovar.tj/wp-content/uploads/2023/04/SREDNEVEKOVYE-NRAVY.-V-Afganistane-zapretili-zhenshhinam-rabotat-v-uchrezhdeniyah-OON.jpg)
ДУШАНБЕ, 06.04.2023 /АМИТ «Ховар»/. Дар Афғонистон барои занону духтарон кор дар ниҳодҳои Созмони Милали Муттаҳид (СММ) манъ карда шуд. Тавре АМИТ «Ховар» иттилоъ медиҳад, дар ин хусус АБИ «Казинформ» бо истинод ба BBC News хабар додааст.
Дар СММ изҳор доштанд, ки гарчанде паёми хаттӣ вуҷуд надошт, вале ҳукуматдорони Афғонистон ба созмон ба таври шифоҳӣ хабар додаанд.
Ба афғонҳо — ҳам мардону ҳам заноне, ки дар муассисаҳои СММ кор мекунанд, гуфта шуд, ки ба кор нараванд — то даме, ки ин масъала аниқ карда нашавад.
Ин талабот ба занҳои афғоне, ки дар СММ ва ниҳодҳои он берун аз Афғонистон кор мекунанд, дахл надорад.
СММ ин амалро ғайри қобили қабул медонад. Намояндаи созмон изҳор дошт, ки ин тамоюли хеле ташвишовар аст.
Кормандони зан дар амалиёти имдодрасонӣ дар маҳал, бахусус дар муайян кардани занони ниёзманд нақши муҳим мебозанд. Созмони Милали Муттаҳид саъй дорад, ки ба 23 миллион нафар дар Афғонистон, ки бо буҳрони шадиди иқтисодӣ ва башардӯстона рӯ ба рӯ ҳастанд, кумаки башардӯстона расонад.
СММ иброз намуд, ки дар вилояти шарқии Нангарҳор мақомоти маҳаллӣ рӯзи сешанбе ба занони афғон иҷозаи кор дар муассисаҳои Созмони Милали Муттаҳидро надодаанд.
«Ман монеъ шудан ба кори ҳамкасбони афғони моро дар вилояти Нангарҳори Афғонистон қатъиян маҳкум мекунам. Агар ин тадбир лағв нашавад, он ҳатман қобилияти моро дар расонидани кумаки наҷотбахш ба одамоне, ки ба он эҳтиёҷ доранд, халалдор мекунад», навиштааст дар саҳифаи расмии Twitter — и худ Дабири кулли созмон Антонио Гутерриш.
Баъди ба сари қудрат омадани ҳукумати нав дар Афғонистон ба ҷавондухтарон ва занон рафтан ба мактабҳо ва коллеҷҳо манъ карда шуд. Занҳо бояд тавре либос пӯшанд, ки танҳо чашмонашон кушода бошад ва агар онҳо 72 км дуртар аз хона сафар кунанд, бояд ягон мард ё хешовандон онҳоро ҳамроҳӣ кунанд.
Моҳи ноябри соли гузашта рафтани занон ба боғҳо, толорҳо ва ҳавзҳо манъ карда шуд, ки ин онҳоро пурра аз озодӣ маҳрум намуд.
Азиза ИКРОМ,
АМИТ «Ховар»
АКС аз манбаъҳои боз