«ОМӮЗГОРИ СОЛИ ТОҶИКИСТОН». Даври минтақавии ин озмун барои шаҳру ноҳияҳои тобеи ҷумҳурӣ ҷамъбаст гардид

ДУШАНБЕ, 29.04.2023. /АМИТ «Ховар»/. Даври минтақавии озмуни «Омӯзгори соли Тоҷикистон», ки 25-27 апрел ҷараён дошт, ҷамъбаст гардид. Дар он омӯзгори фанни химияи гимназия-парваришгоҳи ба номи Б.Ғафурови ноҳияи Рӯдакӣ Санавбар Абдуллозода ҷойи якум,  муаллими  синфҳои ибтидоии МТМУ №28 ноҳияи Варзоб Нозигул Ашурова ҷойи дуюм ва омӯзгори фанни таърих ва ҳуқуқи МТМУ №18 ноҳияи Шаҳринав Зайтуна Қараева ҷойи сеюмро соҳиб шуданд. Дар ин хусус ба АМИТ «Ховар» дар Донишкадаи ҷумҳуриявии такмили ихтисос ва бозомӯзии кормандони соҳаи маориф хабар доданд.

Озмун мутобиқи талаботи Низомномаи он ташкил ва роҳандозӣ гардида, ҷиҳати дар сатҳи касбӣ, одилона ва шаффову беғаразона баргузор гардидани он тадбир андешида шуд.

Барои иштирок дар озмун аз шуъбаҳои маорифи шаҳру ноҳияҳои тобеи ҷумҳурӣ 13 дархост ҷиҳати иштироки омӯзгорон пешниҳод гардида буд. Мутобиқи талаботи банди 7-и Низомномаи озмун он аз рўи 7 шарт гузаронида шуд. Корҳои амалии озмун дар муассисаи №35 ноҳияи Шоҳмансури шаҳри Душанбе баргузор гардид.

Иштирокчиён ва ғолибони озмун аз ҷониби Иттифоқи касабаи кормандони соҳаи маориф бо туҳфаҳои хотиравӣ ва ифтихорномаҳо қадрдонӣ шуданд.

АКС: Донишкадаи ҷумҳуриявии такмили ихтисос ва бозомӯзии кормандони соҳаи маориф