Шумораи ҳалокшудагон аз ярч дар Эквадор ба 43 нафар расид

ДУШАНБЕ, 22.04.2023 /АМИТ «Ховар»/. Шумораи ҳалокшудагон бар асари фаромадани ярч, ки 26 март ба амал омада буд, дар вилояти Чимборасо, воқеъ дар қисмати марказии Эквадор ба 43 нафар расид. Тавре АМИТ «Ховар» хабар медиҳад, дар ин хусус АБИ «Казинформ» бо истинод ба «Синхуа» иттилоъ додааст.

Наҷотдиҳандагон ҷасади 41 нафарро аз зери харобаҳо ва тоннаҳои лой берун оварданд. Ду нафар дар беморхона ба ҳалокат расид.

Тибқи иттилои котиботи раёсати идоракунии хатарҳо, бориши шадид дар масоҳати 24,5 гектар ярчи азиме ба бор овард. Дар айни замон 45 нафар бедарак буда, 43 тан ҷароҳати гуногун бардоштааст. 32 нафар наҷот ёфтааст.

Дар натиҷаи омадани ярч 163 хона вайрон гардида, 1043 нафар бе сарпаноҳ мондааст.

Корҳои наҷотдиҳӣ дар минтақаи офати табиӣ идома дорад.

Шаҳлои САДРИДДИН,
АМИТ «Ховар»

АКС: chinadaily.com.cn