СУТ дар бораи қариб шаш маротиба афзоиш ёфтани гирифторӣ ба COVID-19 дар Осиёи Ҷанубу Шарқӣ гузориш додааст

ДУШАНБЕ, 15.04.2023 /АМИТ «Ховар»/. Теъдоди ҳодисаҳои гирифторӣ ба ковид дар Осиёи Ҷанубу Шарқӣ дар чаҳор ҳафтаи охир нисбат ба ҳамин давраи қаблӣ 481% зиёдтар аст. Тавре АМИТ «Ховар» бо истинод ба ТАСС иттилоъ медиҳад, дар ин бора рӯзи панҷшанбе Созмони умумиҷаҳонии тандурустӣ дар гузориши ҳарҳафтаинаи эпидемиологии худ хабар додааст.

«Теъдоди ҳолатҳои нав, ки дар фосилаи 28 рӯз ба қайд гирифта шуд, дар шаш минтақа коҳиш ёфтааст: Африқо (-45%), ғарби Уқёнуси Ором (-39%), Амрикои Шимолӣ ва Лотинӣ (-33%) ва Аврупо (-22%). Ҳамзамон ин беморӣ дар ду минтақа афзоиш ёфтааст: Осиёи Ҷанубу Шарқӣ (+481%) ва Баҳри Миёназамини Шарқӣ (+144%)», — гуфта шудааст дар гузориш.

Дар маҷмуъ, дар ҷаҳон 3 миллион ҳолати нави бемории ковид ба қайд гирифта шуда, беш аз 23 ҳазор нафар дар натиҷаи ин беморӣ фавтидаанд. Ин назар ба давраи 28-рӯза аз 13 феврал то 12 март 28 фоиз ва 30 фоиз камтар аст.

СУТ барои пайгирии тамоюли беморӣ чаҳорчӯбаи муваққатии 28-рӯза истифода мебарад. Ин барои ба инобат гирифтани таъхирҳо дар гузориш дар бораи ҳолатҳои нави COVID, инчунин барои коҳиш додани таъсир ба омори тағйирёбии ҳарҳафтаина зарур аст. Давраи ҳисоботӣ аз 13 март то 9 апрелро дар бар гирифта, бо давраи аз 13 феврал то 12 март муқоиса карда мешавад.

 АКС аз манбаъҳои боз