«ҲУНАР БЕҲТАР АЗ ЗАР БУВАД». Имрӯз дар Душанбе даври шаҳрии фестивал баргузор шуд

ДУШАНБЕ, 14.04.2023. /АМИТ «Ховар»/. Имрӯз дар Муассисаи давлатии «Боғи фарҳангӣ-фароғатии ба номи Абулқосим Фирдавсӣ» даври шаҳрии Фестивали «Ҳунар беҳтар аз зар бувад» баргузор гардид. Он аз рӯи 6 номинатсия: истеҳсоли маҳсулоти хӯрокворӣ, бофандагӣ ва либос, коркарди маснуоти чӯбӣ, металл ва маснуоти физилӣ, созҳои мусиқӣ ва санъати нафиса баргузор гардид, иттилоъ медиҳад мухбири АМИТ «Ховар».

Ҳадаф аз баргузории фестивали мазкур ҳифз ва нигоҳдории мероси ғайримоддии фарҳангӣ, тарбияи ҳисси зебоипарастӣ, хештаншиносӣ, ҳунармандӣ ва ватандӯстӣ, эҳёи анъанаҳои аҷдодии ҳунарҳои мардумӣ ва оммавӣ гардонидани суннатҳои беҳтарини ҳунарҳои мардумӣ, тарғиби таҷрибаи пешқадами ҳунармандони варзида, муаррифии намудҳои гуногуни маҳсулоти ҳунармандӣ ва дастгирию ҳавасмандгардонии ҳунармандонӣ ватанӣ мебошад.

Дар фестивали мазкур роҳбарияту намояндагони Мақомоти иҷроияи ҳокимияти давлатии шаҳри Душанбе, вазорату идораҳо ва ҳунармандони ноҳияҳои пойтахт иштирок намуданд.

Дар ҷамъбасти фестивал ғолибон ва иштирокчиёни фаъол аз ҷониби намояндагони Мақомоти иҷроияи ҳокимияти давлатии шаҳри Душанбе бо «Диплом»-у «Сипоснома» ва мукофоти пулӣ сарфароз гардонида шуданд.

АКС: АМИТ «Ховар»