«Истиқлол» пас аз ғалаба ба садри ҷадвали Чемпионати Тоҷикистон байни дастаҳои Лигаи олӣ баромад

ДУШАНБЕ, 11.05.2023 /АМИТ «Ховар»/. 10 май ду бозии охири даври ҳаштуми Чемпионати Тоҷикистон   дар байни дастаҳои Лигаи олӣ   байни дастаҳои   футболи  «Равшан»-и шаҳри  Кӯлоб  бо  «Ҳосилот»-и ноҳияи Фархор ва  «Истиқлол»-и шаҳри Душанбе бо «Хатлон»-и шаҳри Бохтар дар варзишгоҳҳои мамлакат   хеле ҷолиб баргузор шуд. Дар ин хусус шореҳи варзиши АМИТ «Ховар»  хабар медиҳад.

Дар дидори даври ҳаштуми Чемпионати Тоҷикистон-2023 дастаи  футболи «Истиқлол»-и шаҳри  Душанбе  дар варзишгоҳи марказии  шаҳри Душанбе   бар дастаи  «Хатлон»-и шаҳри  Бохтар бо ҳисоби калони 5:0 пирӯз шуд. Голҳоро аз   ҳайати дастаи  футболи  «Истиқлол»-и шаҳри Душанбе  Эҳсони Панҷшанбе се маротиба, Содиқҷон Қурбонов ва   Манучеҳр Ҷалилов ба  нишон  расониданд. Эҳсони Панҷшанбе  аз ҳайати дастаи футболи «Истиқлол»-и шаҳри Душанбе  беҳтарин бозингари вохӯрӣ дониста шуд.  Дар бозии дигари ҳамин давр дастаҳои   футболи  «Равшан»-и шаҳри  Кӯлоб  бо  «Ҳосилот»-и ноҳияи Фархор бозияшонро бо ҳисоби мусовии 1:1 анҷом доданд.

Ин ғалаба бар муқобили дастаи футболи  «Хатлон»-и шаҳри Бохтар барои дастаи «Истиқлол»-и шаҳри Душанбе  ғалабаи 250-ум дар бозиҳои Чемпионати Тоҷикистон маҳсуб мешавад. Дар даври навбатии чемпионати Тоҷикистон дастаи футболи   «Истиқлол»-и шаҳри Душанбе  дар ноҳияи Фархор бо дастаи «Ҳосилот» вориди рақобат мегардад. Вохӯрии дастаҳо 13  май  дар Варзишгоҳи марказии ноҳияи Фархор  доир мегардад.  Дастаи «Хатлон»-и шаҳри Бохтар  дар даври навбатӣ 13  май  бо дастаи  футболи «Хуҷанд»-и шаҳри Хуҷанд дар мизбонӣ бозӣ мекунад.

Бояд гуфт, ки  дастаи футболи  «Истиқлол»-и шаҳри Душанбе  пас аз ин ғалаба  бо касби 14  имтиёз  дар садри ҷадвали мусобиқа қарор гирифтааст. Дастаи футболи  «Эсхата»-и шаҳри Хуҷанд бо 13 имтиёз дар ҷойи дуюм қарор дорад. Дар поёни ҷадвали мусобиқот дастаҳои КМВА-и шаҳри Душанбе  ва «Хуҷанд»-и шаҳри Хуҷанд  ҷой гирифтаанд.

Лигаи Олӣ | Даври 8-ум
 «Истиқлол» 5:0  «Хатлон»

Голҳо: Эҳсони Панҷшанбе, 1 (1:0). Эҳсони Панҷшанбе, 14 (2:0). Содиқҷон Қурбонов, 35 (3:0). Эҳсони Панҷшанбе, 68 (4:0). Манучеҳр  Ҷалилов, 70 (5:0).

Хотиррасон мешавем, ки 4-5 май дар доираи бозиҳои даври ҳаштуми Чемпионати Тоҷикистон оид ба футбол дастаҳои «Эсхата»-и шаҳри Хуҷанд ва «Файзканд»-и ноҳияи Восеъ дар ҳузури 3 000 нафар мухлис  байни ҳам бозӣ карданд. Вохӯрии дастаҳо дар варзишгоҳи «Спартак»-и шаҳри Хуҷанд баргузор гардида, бо ҳисоби 1 бар 0 ба фоидаи мизбонон анҷом ёфт. Ягона голро дар дақиқаи 23-юми бозӣ Дилшодҷон Каримов ба нишон расонид. Аз ҳайати дастаи футболи «Файзканд»-и ноҳияи Восеъ – Ҷозеф Феумба бинобар дағал бозӣ кардан дар дақиқаи 64-уми вохӯрӣ аз ҷониби довари марказии бозӣ корти сурх гирифтв, аз бозӣ берун карда шуд. Дилшодҷон Каримов аз ҳайати дастаи футболи «Эсхата»-и шаҳри Хуҷанд беҳтарин бозингари вохӯрӣ дониста шуда буд.

Ёдовар мешавем, ки дар даври гузашта дастаи футболи «Эсхата»-и шаҳри Хуҷанд дар ноҳияи Фархор аз дастаи «Ҳосилот» бо ҳисоби 0 бар 1 мағлуб шуда буд. Дастаи футболи «Файзканд»-и ноҳияи Восеъ дар варзишгоҳи «Нефтяник» ба муқобили дастаи «Регар-ТадАЗ»-и шаҳри Турсунзода бо ҳисоби калонӣ  5 бар  1 ғалаба карда буд.

Ҳоло дар даври навбатии Чемпионати Тоҷикистон дастаи футболи «Эсхата»-и шаҳри Хуҷанд дар ноҳияи Рӯдакӣ бо дастаи «Кӯктош» рақобат мекунад. Вохӯрии дастаҳо 13 май дар варзишгоҳи «Нефтяник» доир мегардад. Дастаи футболи «Файзканд»-и ноҳияи Восеъ дар даври навбатӣ 14 май бо дастаи футболи «Равшан»-и шаҳри Кӯлоб бозӣ мекунад

АКС: Федератсияи футболи Тоҷикистон