ДУШАНБЕ, 28.05.2023 /АМИТ «Ховар»/. 28 май Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон дар ноҳияи Шаҳритуси вилояти Хатлон дар ҷамъомади тантанавӣ ба муносибати Рӯзи сарҳадбонон иштирок ва суханронӣ карданд.

Нахуст, Сарвари давлат муҳтарам Эмомалӣ Раҳмон ҳамаи иштирокчиёни чорабинӣ, афсарону сарбозон ва дар шахси онҳо тамоми сарҳадбонони кишварро ба муносибати солгарди 29-уми таъсисёбии Қушунҳои сарҳадии Кумитаи давлатии амнияти миллии Ҷумҳурии Тоҷикистон ва Рӯзи сарҳадбонони тоҷик табрику таҳният гуфтанд.

Марзи давлатӣ дар радифи арзишҳои миллӣ, забон, таърих, фарҳанг ва дигар муқаддасоти миллӣ аз ҷумлаи муҳимтарин унсурҳои соҳибихтиёрӣ ва соҳибистиқлолии давлат мебошад.

Президенти мамлакат муҳтарам Эмомалӣ Раҳмон таъкид доштанд, ки яке аз масъалаҳои муҳимтарине, ки дар назди давлати мо ҳанӯз дар оғози ба даст овардани истиқлол қарор дошт, таъсис додани сохторҳои марзбон буд.

Зимни суханронӣ Сарвари давлат аз рӯзҳои сахту сангини дар рӯзҳои аввали соҳибистиқлолӣ ба сари мардуми кишвар омада, андешаронӣ карданд. Таъкид шуд, ки Қӯшунҳои сарҳадӣ мисли дигар ҷузъу томҳои Қувваҳои Мусаллаҳ дар давраи ниҳоят ҳассос ва мушкили таърихи кишварамон, яъне дар замоне, ки ҷанги таҳмилии шаҳрвандӣ ҳанӯз идома дошт, таъсис дода шуданд. Бо гузашти солҳо Қӯшунҳои сарҳадӣ ба як сохтори низомии муосир ва сипари боэътимоди ҳифзи марзу буми мамлакат табдил ёфта, аз ҷумлаи дастовардҳои бузурги замони соҳибистиқлолии Тоҷикистон ба шумор мераванд.

Президенти мамлакат изҳор доштанд, ки аз рӯзҳои нахустини таъсисёбии худ Қӯшунҳои сарҳадӣ дар ҳифзи истиқлолу озодии Ватан, ҳимояи амнияти давлату ҷомеа ва зиндагии ороми мардум нақши босазо гузошта, дар мушкилтарин рӯзҳо барои ҳифзи марзҳои давлатӣ ва пешгирӣ кардани воридшавии гурӯҳҳои муташаккилу мусаллаҳи ҷиноӣ, аслиҳа ва маводи мухаддир хизмати воқеан таърихӣ анҷом доданд.

Дар даврони соҳибистиқлолӣ ҷиҳати таъмин намудани ҳимояи боэътимоди сарҳади давлатӣ бисёр иқдомоти зарурӣ — аз ташкили отряду комендатура ва дидбонгоҳу нуқтаҳои гузаргоҳи сарҳадӣ сар карда, то таъсиси муассисаҳои таълимӣ оид ба омода намудани мутахассисони сарҳадбон амалӣ карда шуданд.

Бо дарназардошти аҳаммияти калидии омода кардани мутахассисони баландихтисоси ҳарбӣ, аз ҷумла барои сохторҳои марзбон Ҳукумати мамлакат ба ин масъала эътибори аввалиндараҷа медиҳад.

Тайи даҳ соли охир садҳо нафар ҷавонон Донишкадаи олии сарҳадии Кумитаи давлатии амнияти миллии Тоҷикистон ва даҳҳо тани дигар муассисаҳои таҳсилоти олии кишварҳои хориҷиро хатм намуда, имрӯз дар Қӯшунҳои сарҳадӣ хизмат карда истодаанд.

Сарвари давлат муҳтарам Эмомалӣ Раҳмон роҳбарияти Қӯшунҳои сарҳадӣ, хусусан, ҳайати афсарону омӯзгорони Донишкадаи олии сарҳадӣ, Маркази таълимии “Пойтахт” ва дигар муассисаҳои таълимии Қӯшунҳои сарҳадиро вазифадор карданд, ки пеш аз ҳама, ба такмили сатҳи дониш ва касбияти худ, дар рӯҳияи баланди худшиносиву ватанпарастӣ, ифтихори миллӣ ва садоқат ба халқу Ватан тарбия кардани донишҷӯён, инчунин, омӯзиши амиқи забонҳои хориҷӣ диққати ҷиддӣ зоҳир намоянд.

Президенти мамлакат аз ҷоннисории фарзандони фарзонаи миллат ёдовар шуда, изҳор доштанд, ки мардуми тоҷик ва Ҳукумати мамлакат номи нек ва ҷасорату фидокории хизматчиёни ҳарбии ҷузъу томҳои марзбонро, ки барои ҳифзи марзу буми Ватан, барқарорсозии сохти конститутсионӣ, ҳимояи оромиву суботи мамлакат ва зиндагии осудаи мардуми Тоҷикистон ҳангоми иҷрои вазифаҳои хизматӣ қурбон шудааанд, ҳамеша гиромӣ хоҳанд дошт.

Таъкид шуд, ки вазъи мураккаби сиёсии минтақаву ҷаҳон ва афзоиши таҳдиду хатарҳо тақозо менамояд, ки ҳар як сарбозу афсари бонангу номус ба хотири ҳимояи хоки муқаддаси Ватани азизамон ҳушёрии касбӣ ва зиракии сиёсиро аз даст надода, хизматро содиқона, бо эҳсоси гарми ватандорӣ ва дар сатҳи баланди касбӣ иҷро намояд.

Дар охири суханронӣ Президенти мамлакат муҳтарам Эмомалӣ Раҳмон бори дигар ҳамаи сарҳадбонони тоҷикро бо идашон табрик намуда, иброз доштанд, ки Шумо сарҳадбонон ҳаргиз фаромӯш насозед, ки марзи давлатӣ аз ҷумлаи муқаддасоти миллӣ буда, ҳимояи он рамзи нангу номуси ватандорӣ ва шаъну шарафи ҳар як ҷавонмарди бонангу номуси Ватан мебошад.