Аъзои ҲХДТ дар Бохтар Рӯзи Ваҳдати миллиро бо баргузории чорабинии сиёсӣ-фарҳангӣ ҷашн гирифтанд

ДУШАНБЕ, 25.06.2023. /АМИТ «Ховар»/. 23 июн дар маркази маъмурии вилояти Хатлон — шаҳри Бохтар раёсат ва аъзои Ҳизби Халқии Демократии Тоҷикистон дар вилояти Хатлон бахшида ба Рӯзи Ваҳдати миллӣ чорабинии сиёсӣ-фарҳангӣ таҳти унвони «Ваҳдати миллӣ-падидаи нодиру пурарзиши миллати тоҷик» намуданд, хабар доданд ба АМИТ «Ховар» дар шуъбаи иттилоот ва матбуоти ин Ҳизб дар вилояти Хатлон.

Дар чорабинӣ иштирокдорон дастовардҳои Тоҷикистонро дар ҳама соҳаҳо самари ваҳдати миллӣ арзёбӣ намуда, таъкид карданд, ки баҳри пойдории сулҳу субот ҳама дар якҷоягӣ талош намоем ва баҳри боз ҳам пешрафта шудани сарзамини аҷдодиамон содиқона паҳлуи ҳам истода, кору зиндагӣ намоем. Доир ба аҳамияти бузурги ваҳдати миллӣ, ки бо талошу заҳматҳои Асосгузори сулҳу Ваҳдати миллӣ-Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ба даст омадааст, изҳори назар карда шуд.

Таъкид гардид, ки раёсат ва аъзои ҳизбро зарур аст, ки зери сиёсати Пешвои миллат, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон баҳри рушди ин сарзамин ва расидан ба зиндагии шоистаи мардум беш аз беш заҳмату талош намоянд.

Дар идомаи чорабинӣ иштирокдорон доир ба Ваҳдати миллӣ ҳамчун падидаи беназири сиёсию ҷамъиятӣ, ки дар низоми рушди муносибатҳои миллӣ нақши калидӣ дорад, ибрози назар карда, ин падидаи фараҳбахши даврони соҳибистиқлолиро на танҳо асоси пойдории давлат, балки асоси мавҷудияти миллати тоҷик ҳамчун мардуми соҳибдавлат арзёбӣ намуданд.

АКС: Кумитаи иҷроияи Ҳизби Халқии Демократии Тоҷикистон дар вилояти Хатлон