Иҷозатномаи оператори низоми пардохтии «Атласпэй» барои анҷом додани амалиёти бонкӣ бозхонд гардид

ДУШАНБЕ, 25.06.2023. /АМИТ «Ховар»/. Бо қарори навбатии Раёсати Бонки миллии Тоҷикистон иҷозатномаи оператори низоми пардохтии «Атласпэй», бинобар сабаби аз ҷониби Бонки миллии Тоҷикистон бозхонд гардидани иҷозатномаи Ҷамъияти дорои масъулияти маҳдуди ташкилоти амонатии қарзии хурди «Тамвил» барои анҷом додани амалиёти бонкӣ, бозхонд ва амали он қатъ карда шуд.

Дар Бонки миллии Тоҷикистон ба АМИТ «Ховар» иттилоъ доданд, ки ин тасмим дар асоси дархости ҷамъияти мазкур ва мутобиқи қонунҳои Ҷумҳурии Тоҷикистон «Дар бораи хизматрасониҳои пардохтӣ ва низоми пардохтӣ», «Дар бораи иҷозатномадиҳӣ ба баъзе намудҳои фаъолият» ва «Дар бораи Бонки миллии Тоҷикистон» гирифта шудааст.

Дар асоси ин қарор идораи низоми пардохт уҳдадор гардид, ки дар Феҳристи операторони низомҳои пардохтӣ сабти дахлдорро ворид намояд.

АКС аз бойгонӣ