Сарвари давлат Эмомалӣ Раҳмон дар Неругоҳи барқи обии «Роғун» бо ҷараёни корҳои сохтмонӣ дар бинои дарвозаҳои садамавии СТ-4 шинос шуданд

ДУШАНБЕ, 09.08.2023 /АМИТ «Ховар»/. 9 август Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Сарвазири мамлакат Қоҳир Расулзода бо мақсади шиносоӣ бо ҷараёни корҳои сохтмонӣ ба Неругоҳи барқи обии “Роғун” ташриф оварданд.

Нахуст Пешвои миллат муҳтарам Эмомалӣ Раҳмон бо ҷараёни корҳои сохтмонӣ дар бинои дарвозаҳои садамавӣ-таъмирии нақби сохтмонии қабати чорум  шинос шуданд.

Бинои дарвозаҳои садамавӣ-таъмирии сохтмонии қабати чорум дар сатҳи 1088 метр аз сатҳи баҳр ҷойгир буда, дарозии он 79,4 метрро ташкил медиҳад. Дар ин қитъаи сохтмон 30 нафар дар ду баст фаъолият намуда, корҳои сементатсионӣ, васлу насби оҳанфулузот ва кафшергариро сари вақт ва бо сифати баланд иҷро менамоянд.

Ба Президенти мамлакат муҳтарам Эмомалӣ Раҳмон иттилоъ доданд, ки то имрӯз 95 фоизи корҳои сементатсионӣ дар бинои дарвозаҳои садамавӣ-таъмирии нақби сохтмонии қабати чорум иҷро шудаанд. Корҳои бетонхобонӣ дар ҳаҷми 25 ҳазору 209 метри мукааб иҷро гардидаанд.

Корҳо дар нақби сохтмонии қабати чорум соли 2018 оғоз шудаанд. Нақб ба истиснои баромадгоҳ 1770 метр дарозӣ дорад ва қутраш 15 метрро ташкил медиҳад. Иқтидори обгузаронии нақби сохтмонии қабати чорум дар як сония 3500 метри мукааб мебошад.

Корҳои васлу насби оҳанфулузот   — 1150 тонна ва насби таҷҳизоти гидромеханикӣ  — 112 тонна ба иҷро расонида шудаанд.

Корҳои сохтмону васлгарии иншооти мазкур аз тарафи пудратчии Ҷамъияти саҳомии кушодаи “Тоҷикгидромонтаж”  пеш бурда мешаванд.

Дар айни ҳол корҳои рӯкаши оҳанфулузот пурра ба анҷом расонида шудаанд.

Дар камераи дарвозаҳои садамавӣ ва асосии нақби сохтмонии қабати чорум низ тибқи нақша корҳои сохтмонӣ бо ҷалби мутахассисон дар ду баст ба роҳ монда шуда, рӯз то рӯз бунёдгузорони ин қитъаи сохтмон ба марҳилаи ниҳоии кор дар нақби сохтмонии қабати чорум наздик мешаванд.

Пешвои миллат муҳтарам Эмомалӣ Раҳмон ҳангоми шиносоӣ бо ҷараёни корҳо дар бинои дарвозаҳои садамавӣ-таъмирии нақби сохтмонии қабати чорум бо масъулону мутахассисон суҳбати самимӣ анҷом дода, таваҷҷуҳи онҳоро ба тезонидани корҳои сементатсионӣ ва васлу насби таҷҳизоти гидромеханикӣ  ҷалб намуданд.

Президенти мамлакат муҳтарам Эмомалӣ Раҳмон дар Неругоҳи барқи обии “Роғун” аз ҷараёни корҳои сохтмонӣ дар мавзеи шикасти “Ёнахш”-и нақби  сохтмонии  қабати чорум низ боздид ба амал оварданд.

Корҳои васлу насби оҳанфулузот ва арматурбандию сементатсионӣ бо истифодаи техника ва таҷрибаву кордонии мутахассисон дар мавзеи шикасти “Ёнахш”-и нақби сохтмонии қабати чорум дар доираи нақша ва мутобиқ ба талаботи меъёрҳои соҳа ба сомон расонида шудаанд.

Тибқи лоиҳа, дар мавзеи сохтмони корҳои васлу насби оҳанфулузот 1090 тоннаро ташкил медиҳад. Насб намудани оҳанфулузот, арматурбандӣ ва корҳои кафшергариро муҳандисону коргарон дар муҳлати муайяншуда иҷро кардаанд.  Ҳоло корҳои кафшергарию сементансионӣ бо суръати баланд пеш бурда мешаванд.

Неругоҳи барқи обии “Роғун” аз иншооти калонтарини гидроэнергетикии Ҷумҳурии Тоҷикистон ба ҳисоб рафта, дар оянда рушду нумӯи тамоми соҳаҳои муҳими хоҷагии халқи мамлакатро таъмин месозад.

Дар идомаи боздид Президенти мамлакат муҳтарам Эмомалӣ Раҳмон бо раванди корҳои то имрӯз анҷомёфта ва идомаи васлу насби таҷҳизоти механикию арматурбандӣ дар душохагии нақби сохтмонии қабати чорум шинос шуданд.

Дар натиҷаи дуруст ба роҳ мондани фаъолият коргарон то ин вақт тавонистанд ҳаҷми корҳои бетониро дар доираи нақша ба миқдори 89 ҳазору 770 метри мукааб ба иҷро расонанд. То имрӯз ҳаҷми иҷрошудаи корҳои бетонӣ 35 ҳазору 569 метри мукаабро дар бар мегирад.

Ҳоло корҳои арматурбандӣ, бетонхобонии девору сақфи нақб, васлу насби анкерҳо ва корҳои сементатсионӣ тибқи нақшаи корӣ идома доранд. Иттилоъ дода шуд, ки корҳои сохтмону васлгарӣ ва лоиҳакашӣ дар мавзеи шикасти “Ёнахш”-и нақби  сохтмонии  қабати чорум ва душохагии нақби мазкур аз тарафи пудратчии Лоти 3- Ҷамъияти саҳомии кушодаи “Тоҷикгидроэлектромонтаж” иҷро шуда истодаанд.

Пешвои миллат муҳтарам Эмомалӣ Раҳмон зимни шиносоӣ бо раванди корҳои иҷрошуда дар бинои дарвозаҳои садамавӣ-таҷрибавии нақби сохтмонии қабати чорум, мавзеи шикасти “Ёнахш” ва душохагии нақби номбурда изҳори қаноатмандӣ намуда, ҷиҳати дар оянда сари вақт ва мутобиқ ба талаботи сохтмонӣ пеш бурдани корҳои боқимонда дар иншооти бузурги гидроэнергетикиии Тоҷикистон — Неругоҳи барқи обии “Роғун” ба масъулон дастуру супоришҳои мушаххас доданд.