Соли 2023 дар Донишгоҳи давлатии тиббии Тоҷикистон 1936 нафар шаҳрвандони хориҷӣ таҳсил намуданд

ДУШАНБЕ, 05.08.2023. /АМИТ «Ховар»/. Дар шашмоҳаи аввали соли таҳсили 2022-2023 дар Донишгоҳи давлатии тиббии Тоҷикистон 1936 нафар шаҳрвандони хориҷӣ аз 23 давлати дунё таҳсил намуданд. Дар ин хусус зимни нишасти матбуотӣ ректори донишгоҳи мазкур иттилоъ дод.

Гуфта шуд, ки аз ҷумла дар сатҳи тодипломӣ 1918 нафар, дар сатҳи баъдидипломии илмӣ 6 нафар, дар сатҳи баъдидипломии муолиҷавӣ 12 нафар аз давлатҳои Канада, Финландия, Британияи Кабир, ИМА, Арабистони Саудӣ, Арманистон, Ҳиндустон, Туркманистон, Федератсияи Русия, Бангладеш, Покистон, Қазоқистон, Қирғизистон, Озарбойҷон, Узбекистон, Ҷумҳурии Исломии Эрон, Давлати Исломии Афғонистон, Зимбабве, Руанда, Нигерия, Латвия, Португалия ва Ҳабашистон таҳсил мекунанд.

Дар донишгоҳ таҳсил бо се забон — давлатӣ, русӣ ва англисӣ ба роҳ монда шудааст. Фазои таълимӣ бо забони русӣ нигоҳ дошта шуда, миқдори гурӯҳҳои бо забони русӣ таҳсилкунанда 461 (61,7%), бо забони давлатӣ таҳсилкунанда 180 (24,1%) ва бо забони англисӣ таҳсилкунанда 106 адад (14,2%)-ро ташкил медиҳад.

Зарангези ЛАТИФ,
АМИТ «Ховар»

АКС: АМИТ «Ховар»