ФУТБОЛ. «Истиқлол» Лигаи чемпионҳои Конфедератсияи футболи Осиёро бо мусовӣ оғоз намуд

ДУШАНБЕ, 20.09.2023 /АМИТ «Ховар»/. Чемпиони Тоҷикистон — дастаи «Истиқлол»-и Душанбе дар оғози марҳилаи гурӯҳии Лигаи чемпионҳои Конфедератсияи футболи Осиё-2023/24 дар гурӯҳи «Е» бо чемпиони Қатар — дастаи «Ал-Дуҳайл» бозиро мусовӣ (0:0) намуд. Дар ин хусус ба АМИТ «Ховар» дар Федератсияи футболи Тоҷикистон хабар доданд.

Ин бозӣ 19 сентябр дар Варзишгоҳи марказии ҷумҳуриявии Душанбе баргузор шуда, 17 500 тамошобинро ба ҳам овард.

«Истиқлол» дар даври дуюми марҳилаи гурӯҳӣ бо бошгоҳи «Ал-Наср»-и Арабистони Саудӣ, ки дар даври аввал бар «Персеполис»-и Эрон (2:0) пирӯз шуд, бозӣ менамояд. Бозии «Ал-Наср» – «Истиқлол» 2 октябр дар варзишгоҳи «Ал-Аввал»-и шаҳри Риёз баргузор шуда, соати 21:00 ба вақти маҳаллӣ (23:00 ба вақти Душанбе) оғоз мешавад.

АКС: Федератсияи футболи Тоҷикистон