Аъзои фаъоли Ҳизби Халқии Демократии Тоҷикистон ба таври ихтиёрӣ ба сафи Қуввваҳои Мусаллаҳ пайваст шуданд

ДУШАНБЕ, 02.10.2023 /АМИТ «Ховар»/. Дар ноҳияи Ховалинги вилояти Хатлон Рӯзи даъватшаванда бо шукуҳу шаҳомати хосса доир гардид. Дар ин хусус ба АМИТ «Ховар» дар Мақомоти иҷрояи ҳокимияти давлатии ноҳияи Ховалинг иттилоъ доданд.

Дар ин рӯз падару модарон ва наздикони наваскароне, ки ихтиёран барои шомил шудан ба сафи Қувваҳои Мусаллаҳи Ҷумҳурии Тоҷикистон ариза пешниҳод намуда буданд, руҳи болида доштанд.

Бо садои марши тантанавӣ ва мусиқии ватандӯстона наваскарон ба саҳни ҷашнгоҳ ворид гардида, дар майдон саф оростанд.

Раиси ноҳия ба наваскароне, ки ихтиёран ба сафи Артиши миллӣ мепайванданд, неруву матонати бузург ва хизмати софдилонаю содиқона ба Ватанро таманно намуд. Иброз гардид, ки хизмат ба Ватан- ин қарзи шаҳрвандии ҳар ҷавонмард буда, далериву ҷасурии ҷавонони моро инъикос менамояд. Ҳар ҷавонро зарур аст, ки аз ин мактаби ҷасорату матонат гузашта, дар ҳифзи марзу буми мамлакат саҳми арзанда гузорад. Ҳамчунин ба падару модари наваскарон барои тарбияи ватандӯстонаи фарзандон ва дарки масъулияти баланд миннатдорӣ баён гардид.

Дар қатори ҷавононе, ки ихтиёрӣ ба сафи Қувваҳои Мусаллаҳ пайваст шуданд, аъзои фаъоли Ҳизби Халқии Демократии Тоҷикистон Абдураҳмони Абдулмаҷид ва Исмоили Саймуҳаммад- сокинони Ҷамоти деҳоти Ҷомбахт низ буданд, ки инро метавон намунаи ибрат барои дигар ҷавонон хонд.

Дар анҷоми ҳамоиш ҳунармандони бахши фарҳанги ноҳия барои гусели наваскарон барномаи рангини фарҳангӣ намоиш доданд.

АКС: Мақомоти иҷрояи ҳокимияти давлатии ноҳияи Ховалинг