Дар Коллеҷи кишоварзии Мастчоҳ озмоишгоҳи байторӣ ташкил шуд

ДУШАНБЕ, 22.10.2023 /АМИТ «Ховар»/. Дар Коллеҷи кишоварзии ноҳияи Мастчоҳ озмоишгоҳи омӯзишии беҳдошти байторӣ ва ташхиси бемориҳои чорво ташкил ёфт, хабар медиҳад АМИТ «Ховар» бо истинод ба дафтари матбуоти Раиси ноҳияи Мастчоҳ.

Озмоишгоҳ дар доираи лоиҳаи «Мусоидат ба рафъи оқибатҳои иқтисодии COVID-19»-и Барномаи рушди Созмони Милали Муттаҳид ва бо дастгирии Ҳукумати Федератсияи Русия дар ҳамкорӣ бо Ҷумҳурии Тоҷикистон ифтитоҳ ёфта, бо таҷҳизоти муосири соҳаи байторӣ муҷаҳҳаз гардид.

Ташкили озмоишгоҳ метавонад ба рушди малакаи касбӣ ва омода намудани мутахассисони соҳаи байторӣ дар ноҳия заминаи амалӣ гузорад.

Ҳамзамон донишҷӯёни муассиса зимни омӯзиши машғулияти амалӣ дар озмоишгоҳ бо бордоркунии сунъии чорво, инчунин ташхиси бемориҳои сирояткунандаи ҳайвонот шинос гардида, роҳҳои муолиҷа ва тарзи пешгирии бемориҳои сирояткундаи ҳайвонот ва гузаронидани ваксинаҳоро амалан меомӯзанд.

Соҳаи чорводорӣ ва парандапарварӣ дар ноҳия сол аз сол ривоҷ ёфта, ташкили чунин озмоишгоҳҳо метавонад минбаъд ба хизматрасонии босифати байторӣ ҷиҳати сари вақт пешгирӣ намудани касалиҳои сирояткунанда мусоидат намояд.

Дар Коллеҷи кишоварзии ноҳияи Мастчоҳ факултаи зооветеринарӣ – байторӣ амал менамояд. Ҳоло дар он беш аз 120  донишҷӯ, ки 11 нафари он духтарон мебошанд, аз рӯи ихтисоси байторӣ таҳсил менамоянд.

АКС: дафтари матбуоти Раиси ноҳияи Мастчоҳ