Дар шаҳри Санкт-Петербург ҷаласаи кумитаи Ассамблеяи байнипарлумонии Иттиҳоди Давлатҳои Мустақил оид ба иқтисод ва молия доир шуд

ДУШАНБЕ, 12.10.2023 /АМИТ «Ховар»/. Имрӯз таҳти раёсати раиси кумитаи Маҷлиси намояндагон оид ба иқтисод ва молия, муовини Раиси комиссияи доимии Ассамблеяи байнипарлумонии Иттиҳоди Давлатҳои Мустақил оид ба иқтисод ва молия Маҳмадалӣ Қурбонзода дар шаҳри Санкт-Петербурги Федератсияи Русия ҷаласаи кумитаи мазкур баргузор гардид.  Дар ин хусус АМИТ «Ховар» бо истинод ба Маҷлиси намояндагони Маҷлиси Олии  Ҷумҳурии Тоҷикистон хабар медиҳад.

Иштирокчиёни ҷаласа фаъолияти гурӯҳи корӣ оид ба таҳияи лоиҳаи қонуни намунавӣ «Дар бораи шуғли платформа», ҷараёни кор дар лоиҳаи қонунҳои намунавӣ «Дар бораи стандартизатсия», «Дар бораи банақшагирии стратегӣ»-ро, ки аз ҷониби Ҳукумати Санкт-Петербург таҳия шудаанд, баррасӣ намуданд.

Дар ҷаласа ҳамчунин намояндагони Донишгоҳи молиявии назди Ҳукумати Федератсияи Русия ва Маркази сиёсати андози Пажуҳишгоҳи молиявии Вазорати молияи Федератсияи Русия роҷеъ ба мафҳум ва  бобҳои «Андоз аз амвол», «Андоз аз замин» «Нақлиёт», «Қисми махсуси Кодекси намунавии андоз барои давлатҳои аъзои Иттиҳоди Давлатҳои Мустақил» сухан гуфтанд.

Дар фарҷоми ҷаласа аъзои комиссия дар чорабиниҳое, ки дар доираи Форуми байналмилалии «Рушди устувори манотиқи кӯҳистон» баргузор гардид, иштирок намуданд.

АКС: Маҷлиси намояндагони Маҷлиси Олии  Ҷумҳурии Тоҷикистон