Дар Академияи Вазорати корҳои дохилии Тоҷикистон маросими тантанавии савгандёкунии курсантон баргузор шуд

ДУШАНБЕ, 18.11.2023 /АМИТ «Ховар»/.  Дар Академияи Вазорати корҳои дохилии Ҷумҳурии Тоҷикистон маросими тантанавии савгандёкунии курсантони курси якуми ин академия баргузор гардид, иттилоъ медиҳад АМИТ Ховар бо истинод ба Вазорати корҳои дохилии мамлакат.

Дар маросими савгандёдкунии афсарони ояндаи милисияи тоҷик Вазири корҳои дохилӣ сухан гуфта, курсантони соли якумро бо ин рӯзи фаромӯшнашаванда табрик гуфта, онҳоро баҳри босамар истифода бурдан аз шароити муҳайёнамудаи Ҳукумати мамлакат ҷиҳати аз худ намудани донишҳои замонавӣ ва соҳавӣ, кӯшиш баҳри баланд бардоштани омодагии ҷисмониву низомӣ ва ҳамеша содиқ будан ба халқу Ватан ҳидоят намуд. 

Ҳамчунин дар ин рӯз толори фарҳангии Академияи Вазорати корҳои дохилии Ҷумҳурии Тоҷикистон ифтитоҳ гардид.

Таъкид карда шуд, ки вазорати корҳои дохилии Ҷумҳурии Тоҷикистон ҷиҳати дар сатҳи баланд омода намудани кадрҳои ба талаботи замон мутобиқ, фароҳам овардани шароити мусоиди илмомӯзӣ барои шунавандагону курсантон, инчунин дар ин замина бо ҷойи кор таъмин намудани хатмкунандагони ин даргоҳи маърифат ҳамеша таваҷҷуҳи хосса зоҳир менамояд.

АКС: Вазорати корҳои дохилии Ҷумҳурии Тоҷикистон