Дар шаҳри Турсунзода Рӯзи Парчами давлатӣ бошукуҳ таҷлил гардид

ДУШАНБЕ, 24.11.2023. /АМИТ «Ховар»/. Парчами давлатӣ нишони муқаддас, рамзи ҳувият, ифтихору нанг ва шарафи мамлакат арзёбӣ гардида, мавқеи сиёсӣ ва таърихиву фарҳангии ҷумҳуриро дар сатҳи ҷаҳонӣ инъикос менамояд. Ин нукта зимни баргузории ҷашни  пуршукуҳ ба ифтихори Рӯзи Парчами давлатӣ дар шаҳри Турсунзода иброз гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳр. 

Ҳамзамон бахшида ба ин рӯз шумораи зиёди сокинон ва фаъолони шаҳр ба раҳпаймоии идона баромаданд.

Иброз гардид, ки Парчам ва оини парчамдории миллати тоҷик дорои таърихи ҳазорсола буда, давоми асрҳо ба сифати омили нангу номуси ватандорӣ мардуми моро муттаҳид ва ба муборизаҳои озодихоҳона ҳидоят намуда, ҷиҳати расидан ба озодиву истиқлол неруву тавони тоза бахшидааст.

Маҳз бо шарофати Истиқлолияти давлатӣ ва пайкори созандаи муҳтарам Пешвои миллат Парчами давлатии миллати тамаддунофари мо бо симову ҷилои нав партавфишон гардид, ки таҷассумгари гузаштаи шоён ва ояндаи дурахшони Тоҷикистон маҳсуб шуда, рамзи озодиву Истиқлол, иттиҳоду сарҷамъӣ, ватандӯстиву ватанпарастӣ, ҳувият ва ифтихори миллии мардуми куҳанбунёду фарҳангдӯсти мо мебошад.

Таъкид гардид, ки Парчами давлатии Тоҷикистон ҳамчун нишона аз мардуми сулҳхоҳу тамаддунсози мо дар созмонҳои бонуфузи ҷаҳонӣ ва чорабиниҳои сиёсии байналмилалӣ афрохта шуда, ифодагари соҳибихтиёрии давлат ва ҷузъи ҷудонопазири ҷомеаи ҷаҳонӣ будани Тоҷикистонро муаррифӣ намуда, нишонаи ифтихору руҳбаландӣ ва эҳтироми ҳамватанони мо дар арсаи ҷаҳонӣ мебошад.

АКС: Мақомоти иҷроияи ҳокимияти давлатии шаҳри Турсунзода