Дар Суғд Мусобиқа оид ба бокс байни калонсолон барои дарёфти Ҷоми Раиси вилоят идома дорад

ДУШАНБЕ, 08.11.2023 /АМИТ «Ховар»/. 7 ноябр дар Қасри варзиши шаҳри Хуҷанд маросими ифтитоҳи Мусобиқа​ оид ба бокс байни калонсолон барои дарёфти Ҷоми Раиси вилояти Суғд баргузор гардид. Дар ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Мусобиқа ба Рӯзи Конститутсияи Ҷумҳурии Тоҷикистон бахшида шуда, ​ то 10 ноябр идома меёбад.

Дар маросими ифтитоҳи он иброз гардид, ки​ дар Ҷумҳурии Тоҷикистон таҳти роҳбарии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои инкишофи ҳамаҷонибаи тарбияи ҷисмонӣ ва варзиш дар байни оммаи мардум ва варзишгарони касбию дӯстдорони ин соҳа пайваста мусобиқаҳои варзишӣ доир мешаванд.

Дар Ҷумҳурии Тоҷикистон, аз ҷумла вилояти Суғд аз замони пеш то ин дам варзишгарони болаёқату номдор ба воя мерасанд.​ Бокс дар вилоят яке аз намудҳои маъмул ба ҳисоб рафта, шумораи дӯстдорони он аз ҳисоби ҷавонону наврасон торафт меафзояд.​

Имрӯз мо бо ифтихор номи варзишгарони вилоят Ҷаҳон Қурбонов, Абдусалом Ҳасанов, Асрор Воҳидов, Довуд Махкамов, Шаҳбоз Ҳаитов, Искандарбек Рустамов, Хусравхон Раҳимов, Абураҳим Ёқубов ва дигаронро ба забон меоварем, ки шарафи варзиши тоҷикро дар миқёси байналмилалӣ баланд бардошта, Парчами Тоҷикистони азизро дар варзишгоҳу майдонҳои бузурги ҷаҳон парафшон сохтаанд.

Дар мусобиқаи кушод оид ба бокс​ беш аз 80 нафар варзишгарон,​ аз ҷумла муштзанон аз ҷумҳуриҳои дӯсту бародари Узбекистон, Қазоқистон, Беларус, Қирғизистон, Федератсияи Русия иштирок доранд.

АКС: Хадамоти матбуоти Раиси вилояти Суғд