ФУТБОЛ. Дастаи «Истиқлол»-и Душанбе барандаи даҳкаратаи Ҷоми Тоҷикистон гардид

ДУШАНБЕ, 02.11.2023. /АМИТ «Ховар»/. Дастаи «Истиқлол»-и Душанбе дар бозии ниҳоии Ҷоми Тоҷикистон-2023 бар дастаи «Равшан»-и Кӯлоб пирӯз шуда, барандаи даҳкаратаи ин ҷоиза гардид. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Қаблан бошгоҳи шаҳри Душанбе дар солҳои 2009, 2010, 2013, 2014, 2015, 2016, 2018, 2019 ва 2022 барандаи Ҷоми Тоҷикистон шуда буд. Барои сармураббӣ Игор Черевченко ин аввалин ҷоиза бо «Истиқлол» ба ҳисоб меравад.

Бозии ниҳоии Ҷоми Тоҷикистон-2023  1 ноябр дар варзишгоҳи «Кӯлоб Арена» баргузор шуд, ки беш аз 12 ҳазор мухлис тамошо намуданд. Вақти асосии бозӣ мусовӣ — 0:0 анҷом ёфт. Дар қисматҳои изофӣ дастаҳо якголӣ заданд – 1:1. «Истиқлолиҳо» ба голи легионери ганагии «Равшан» Ҷозеф Акомади бо зарбаи дақиқи ҳимоятгари марказӣ Содиқҷон Қурбонов посух доданд.

Дар силсилазарбаҳои пеналти «Истиқлол» муваффақ шуд ​​– 4:2. Дарвозабон Рустам Ятимов зарбаи ҷаримавии дарвозабони «Равшан» Евгений Гритсенкоро баргардонд ва дар ниҳоят беҳтарин бозигари финал эътироф гардид.

АКС: Федератсияи футболи Тоҷикистон