5 декабр дар се минтақаи шаҳри Душанбе фан-зона барои тамошои бозии «Истиқлол» ва «Ал-Наср» ташкил мешавад

ДУШАНБЕ, 03.12.2023. /АМИТ «Ховар»/. Ба диққати мухлисони футбол мерасонем, ки 5 декабр барои ҳаводорони футбол дар се минтақаи шаҳри Душанбе – назди марказҳои савдои «Ашан», «Сиёма мол» ва ҳамзамон дар назди бинои Театри давлатии академии опера ва балети ба номи Садриддин Айнӣ фан-зона* барои тамошои бозии «Истиқлол» ва «Ал-Наср» ташкил мешавад.

Тавре шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад,  то вохӯрии даври ниҳоии марҳилаи гурӯҳии Лигаи чемпионҳои Осиё-2023/24 байни дастаҳои футболи  «Истиқлол»-и   Тоҷикистон ва «Ал-Наср»-и  Арабистони Саудӣ 4 рӯз боқӣ монда, аз нисф зиёди чиптаҳои бозӣ аллакай фурӯхта шудаанд.

Чиптаҳои бозии дарпешистода дар се категория пешниҳод шудаанд. Категорияи якум – нишастгоҳҳои ғарбӣ (бахшҳои 1, 2, 3, 4) мебошанд, ки нархаш 300 сомонӣ аст. Барои нишастгоҳҳои боқимонда (шимолӣ, шарқӣ ва ҷанубӣ) нархи як чиптаи категорияи дуюм 100 сомонӣ муқаррар шудааст. Арзиши чиптаҳои категорияи VIP 3000 сомониро ташкил медиҳад.

Хотиррасон мешавем, ки чиптаҳо дар хазинаи Варзишгоҳи марказии ҷумҳуриявии шаҳри Душанбе ва дар мағозаи расмии «Истиқлол» – «Joma» дар суроғаи шаҳри  Душанбе, хиёбони Рӯдакӣ-85 ба фурӯш гузошта шудаанд.

Вохӯрии даври шашуми марҳилаи гурӯҳии Лигаи чемпионҳои Осиё-2023/24 байни  дастаҳои футболи  «Истиқлол»-и Тоҷикистон ва «Ал-Наср»-и Арабистони Саудӣ  5 декабр, соати 21:00 дар Варзишгоҳи марказии шаҳри  Душанбе баргузор мешавад.

Фурсати тамошои рақобати ҷолибро дар монитори калон аз даст надиҳед!

 АКС: Федератсияи футболи Тоҷикистон

_____________

*Фан-зона минтақаи муайяни хеле наздик ба саҳна ё монитор аст, ки ҳама метавонанд аз он аксбардорӣ намоянд ё бозингаронро то ҳадди имкон аз наздик бубинанд.