Ба Институти тибби ветеринарии Академияи илмҳои кишоварзии Тоҷикистон таҷҳизот ва лавозимоти муосир ворид гардид

Декабрь 9, 2023 19:00

ДУШАНБЕ, 09.12.2023 /АМИТ «Ховар»/. 9 декабр дар Институти тибби ветеринарии Академияи илмҳои кишоварзии Тоҷикистон маросими расмии супоридани  як қатор таҷҳизот ва лавозимоти муосир доир гардид. Ин иқдом дар  доираи лоиҳаи миллии TAD5006 – «Татбиқи усулҳои ядроӣ ва молекулярӣ, барои ташхис ва назорати бемориҳои фаромарзии ҳайвонот», ки  бо дастгирии Агентии амнияти химиявӣ, биологӣ, радиатсионӣ ва ядроии Академияи миллии Тоҷикистон   ва Агентии байналмилалии нерӯи атомӣ (АБНА) татбиқ  мегардад, амалӣ шуд. Дар ин хусус ба АМИТ «Ховар» дар шуъбаи муносибатҳои байналмилалӣ  ва робита бо ҷомеаи Агентии амнияти химиявӣ, биологӣ, радиатсионӣ ва ядроӣ хабар доданд.

Мақсади татбиқи лоиҳаи мазкур ин ташхис,   муайян намудани   микроорганизмҳои касаливор, ки дар хоҷагиҳои чорводорӣ ва парандапарварии Ҷумҳурии Тоҷикистон ба қайд гирифта мешаванд,  мебошад.

Инчунин  воридоти таҷҳизоти мазкур ба олимон ва мутахассисони соҳа имконият фароҳам меорад, ки мониторинги бемориҳои сироятӣ, бахусус зоонозҳо (бемориҳои шадиди сироятии одаму ҳайвонот) ва зери назорат гирифтани вазъи эпизоотӣ дар байни ҳайвоноти ваҳшӣ ва хонагӣ осон гардида, дар ин замина ҷиҳати  амалишавии барномаҳои давлатӣ ва стратегияҳои миллӣ, аз ҷумла таъмини амнияти озуқавории мамлакат таъсири мусбат расонад.

Мавриди тазаккур аст, ки бо мақсади беҳтар намудани раванди корҳои илмӣ-тадқиқотӣ ва истифодаи таҷҳизоти воридгардида, якқатор олимони институт дар давлатҳои хориҷӣ, аз ҷумла Федератсияи Русия, Ҷумҳурии Австрия,  Македонияи Шимолӣ  ва Туркия аз  таҷрибаомӯзии      илмӣ гузашта, соҳиби сертификатҳои байналмилалӣ гардиданд.

Ҳамчунин  дар доираи  лоиҳаи  мазкур дар институт панели офтобӣ насб карда шуд, ки барои устувор нигоҳ дошатни фаъолияти таҷҳизоти озмоишгоҳӣ   ва  амалисозии ташхисҳои молекулярӣ ҷиҳати муайян намудани  барангезандагони бемориҳои махсусан хавфноки чорвою паранда ва зоонозҳо, шароит фароҳам меорад.

Айни замон  ба Институти тибби ветеринарии Академияи илмҳои кишоварзии Тоҷикистон таҷҳизоти дигари соҳа низ, ки барои ташхисҳои серологӣ, бактериологӣ ва вирусологӣ, ҷиҳати  ҷудосозии вирусҳо, бактерияҳо ва муайян намудани намуди онҳо муҳим аст, ворид гардидааст ва насби онҳо дар рӯзҳои  наздик аз ҷониби коршиносони байналмилалӣ банақша гирифта шудааст.

Чунин ҳамкории доимӣ бо ниҳодҳои байналмилалӣ ба иқтидори техникӣ ва зеҳнии пажӯҳишгоҳи илмӣ таъсири мусбат мерасонад ва дар ин замина Институти тибби ветеринарӣ нақша дорад тавассути лоиҳаҳои техникӣ ҳамкориҳоро бо дастгирии   Агентии амнияти химиявӣ, биологӣ, радиатсионӣ ва ядроии Академияи миллии Тоҷикистон   ва Агентии Байналмилалии Нерӯи Атомӣ барои тақвият бахшидани роҳҳои муосири ташхис ва пешгирии бемориҳои сироятӣ, аз он ҷумла зоонозҳо, ки хавфи калони сироятёбиро дар байни ҳайвонот ва одамон ба вуҷуд меоранд, тадибрҳои муҳим андешанд  ва барои баланд бардоштани савияи касбии олимони соҳа ҳамкориро  идома диҳанд.

АКС: Шуъбаи муносибатҳои байналмилалӣ  ва робита бо ҷомеаи Академияи миллии илмҳои Тоҷикистон

 

Декабрь 9, 2023 19:00

Хабарҳои дигари ин бахш

Британияи Кабир фурӯши телефонҳои мобилиро ба кӯдакон ва наврасони то 16-сола манъ менамояд
Дар Қазоқистон бар асари обхезиҳо қариб 98 ҳазор нафар тахлия шуданд
Зиёда аз 1,8 ҳазор сокини иёлати Ютаи Амрико пас аз рахна шудани сарбанди кӯл зери хатар қарор доранд
Дар Душанбе конференсияи байналмилалии «Муколамаи мутамаддини Русия ва мамлакатҳои Осиёи Марказӣ» оғоз гардид
12 АПРЕЛ-РӮЗИ БАЙНАЛМИЛАЛИИ ПАРВОЗИ ИНСОН БА КАЙҲОН. Фатҳи кайҳон аз тарафи инсон: аз асотир то ҳақиқат
Ҳамкории Маркази тадқиқоти стратегии Тоҷикистон ва Институти байналмилалии Осиёи Марказӣ тақвият меёбад
Имрӯз дар Тоҷикистон ҳаво тағйирёбанда шуда, борони кӯтоҳмуддат меборад
Бар асари сардии шадид дар Муғулистон дар маҷмуъ 6,3 миллион сар чорво нобуд гардид
Дар шаҳри Ҳисор ба 9 нафар шахси имконияташ маҳдуд аробачаи маъюбӣ супорида шуд
«САЙРИ ГУЛИ ЛОЛА». Суратгузориш аз Фурудгоҳи байналмилалии Хуҷанд манзур мегардад
Чор нафар бо гумони шарикӣ дар тирпаронӣ дар шаҳри Филаделфияи Амрико боздошт шуданд
Дар минтақаҳои Русия беш аз 12 ҳазор манзили истиқоматӣ зери об мондаанд