«БАРНОМАИ ДАВЛАТИИ СОЛИМИИ РЕПРОДУКТИВӢ БАРОИ СОЛҲОИ 2023-2027». Дар Душанбе ҷараёни иҷрои он баррасӣ шуд

ДУШАНБЕ, 25.12.2023. /АМИТ «Ховар»/. Дар шаҳри Душанбе оид ба ҷараёни иҷрои «Барномаи давлатии солимии репродуктивӣ барои солҳои 2023-2027», ки бо Қарори Ҳукумати Ҷумҳурии Тоҷикистон аз 31 августи соли 2023 тасдиқ шудааст, ҳамоиш доир шуд, иттилоъ медиҳад АМИТ «Ховар» бо истинод ба Раёсати тандурустии шаҳри Душанбе.

Тазаккур дода шуд, ки ин Барнома бо мақсади баланд бардоштани дастрасӣ, сифат ва самаранокии хизматрасонии репродуктивии аҳолӣ, беҳтар намудани саломатии занон, тарбияи ахлоқии ҷинсӣ, ҷалб намудани шарикони рушд, ташкилоти ҷамъиятӣ ва бахши хусусӣ барои таъмин намудани муассисаҳои кумаки аввалини тиббию санитарӣ бо маводи контрасептивӣ, ба кормандони соҳа омӯзонидани солимии репродуктивӣ, фаъолкунии идорасозии таъминот ва тақсимоти маводи пешгирандаи ҳамл таҳия шудааст.

Ҳамзамон ҳадафи Барнома- таҳияи маводи иттилоотӣ, маърифатӣ, баланд бардоштани маърифатнокӣ ва дониши аҳолӣ оид ба масъалаҳои солимии репродуктивӣ, беҳбудии саломатии модарон ва навзодон, кӯдакону наврасон ва ҳифзи солимии репродуктивии аҳолӣ дар заминаи фарогирии умумии хизматрасонии тандурустӣ маҳсуб мешавад.

Вазифаҳои Барнома ба ҳифзи солимии репродуктивии аҳолӣ, дастрасӣ ба хизматрасонии солимии репродуктивӣ, паст намудани фавти модарон, таъмини муассисаҳои тиббӣ бо техника ва технологияи муосир, беҳтар намудани вазъи молиявии муассисаҳои тиббӣ ва таъмини муассисаҳои таълимӣ бо маводи таълимии зарурӣ ҷиҳати самаранок баргузор намудани дарсҳои таълимӣ вобаста ба солимии репродуктивии аҳолӣ равона шудаанд.

Дар ҳамоиш як гурӯҳ иштирокчиён доир ба ҷараёни иҷрои барнома маъруза намуданд.

АКС: Раёсати тандурустии шаҳри Душанбе