Барои омӯзгорони шаҳри Душанбе маҷаллаи «Маориф: таҳлил ва иттилоот» таъсис ёфт

ДУШАНБЕ, 18.12.2023. /АМИТ «Ховар»/. Бо мақсади нашри мақолаҳои таълимӣ, методӣ, таҳлилӣ, илмӣ, оммавӣ, баррасии мушкилоти соҳа ва ёрии методӣ ба омӯзгорон дар назди Маркази таҳлилӣ — иттилоотии назди Сарраёсати маорифи шаҳри Душанбе маҷаллаи «Маориф: таҳлил ва иттилоот» таъсис ёфт. Дар ин хусус ба АМИТ «Ховар» дар Сарраёсати маорифи шаҳри Душанбе хабар доданд.

Ҳадафи маҷалла мусоидат ба рушди илмҳои педагогикӣ, равоншиносӣ, инъикоси фаъолияти пурсамари аҳли маорифи пойтахт, баланд бардоштани сатҳу сифати таълиму тарбия дар муассисаҳои таълимии пойтахт ва инъикоси дигар паҳлуҳои соҳа мебошад.

Омӯзгорон метавонанд аз ин минбар таҷрибаи худро паҳн сохта, доир ба дастовардҳои илмҳои педагогикаву психология, мактабшиносӣ, усулҳои муосир ва пурсамари тадриси фанҳои таълимӣ мақолаҳо нашр намоянд.

АКС: Сарраёсати маорифи шаҳри Душанбе