Дар Ҳисор мусобиқаи минтақавии бокс оид ба дарёфти Ҷоми Кумитаи иҷроияи ҲХДТ ҷамъбаст шуд

ДУШАНБЕ, 20.12.2023 /АМИТ «Ховар»/. Дар шаҳри Ҳисор мусобиқаи минтақавии бокс байни наврасону ҷавонони шаҳрҳои Душанбе, Турсунзода ва Ҳисор барои дарёфти «Ҷоми Кумитаи иҷроияи Ҳизби Халқии Демократии Тоҷикистон дар шаҳри Ҳисор» ҷамъбаст шуд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад.

Мусобиқаи минтақавии бокс бо  сарпарастии роҳбарияти Мақомоти иҷроияи ҳокимияти давлатии шаҳри Ҳисор бахшида ба 29-солагии таъсиси Ҳизби Халқии Демократии Тоҷикистон дар ҳамкорӣ бо Кумитаи иҷроияи ҲХДТ дар шаҳри Ҳисор, шуъбаи маориф ва бахши кор бо ҷавонон ва варзиши шаҳр гузаронида шуда,  дар  он 52 нафар  наврасону ҷавонон дар вазнҳои то 20, 25, 30, 35, 40, 45, 50, 55 ва то 60 кг қувва озмуданд.

Бо хулосаи ҳайати ҳакамон камарбанди сиёҳи мусобиқа насиби Сайфиддин Асоев  дар вазни 52 кг аз шаҳри Душанбе гардид. Аз рӯи ҳамаи вазнҳо шаҳри Ҳисор сазовори ҷойи якум ва сазовори «Ҷоми Кумитаи иҷроияи Ҳизби Халқии Демократии Тоҷикистон дар шаҳри Ҳисор» гардид.

Мақоми дуюмро  варзишгарони шаҳри Душанбе ва мақоми сеюмро шаҳри Турсунзода соҳиб шуданд. Ба ғолибони мусобиқа дар фазои тантанавӣ Диплом ва ҷоизаву медалҳо тақдим шуданд.

Баргузории мусобиқаи варзишии бокс байни  наврасон ва ҷавонон ба ҷалби бештари наврасону ҷавонон ба варзиш ва ташаккули тарзи ҳаёти солим мусоидат менамояд.

АКС: Мақомоти иҷроияи ҳокимияти давлатии шаҳри Ҳисор