Дар ноҳияи Хуросон 20 китобхона ба дӯстдорони мутолиа хизмат мерасонанд

ХУРОСОН, 17.12.2023. /АМИТ «Ховар»/. Фаъолияти самарабахши масъулини бахши фарҳанги ноҳияи Хуросон сабаби он гардид, ки соли 2023 аз ноҳия 760 нафар дар Озмуни ҷумҳуриявии «Фурӯғи субҳи доноӣ китоб аст» иштирок намуда, ба гирифтани ҷойҳои намоён сазовор гарданд, хабар медиҳад мухбири минтақавии АМИТ «Ховар» Сулаймон Холзода.

Тавре масъулин иттилоъ доданд, дар айни замон дар ноҳия 20 китобхона фаъолият менамояд. Аз ин шумора  як китобхонаи марказӣ, як китобхонаи бачагона ва боқимонда китобхонаҳои деҳот мебошанд, ки имрӯз сатҳи хизматрасониро ба аҳолӣ беҳтар намудаанд. Дар китобхонаи бачагонаи №6-и ноҳия, ки чанде пеш бо дастгирии сокинону соҳибкорон таъмири ҷорӣ гардид, баҳри хонандагон адабиёти зарурӣ фароҳам оварда шудааст ва  ҳамарӯза дӯстдорони китоб аз он ба таври васеъ истифода мебаранд.

Мудири китобхонаи бачагонаи №6-и ноҳия Фарзона Сафаралиева иттилоъ дод, ки «дар китобхона ҳамагӣ 2154 адад китоб мавҷуд мебошад, ки аз он 1184 адад бо забони тоҷикӣ ва 970 адад бо забони русиянд. Инчунин дар китобхона китобҳои тозанашри бисёре вуҷуд доранд. Ин аст, ки се нафар хонандагони мо дар озмуни «Фурӯғи субҳи доноӣ китоб аст» фаъолона иштирок намуданд».

Дар китобхона ба хотири ҷалби наврасон ба китобу китобхонӣ ва аз худ намудани ҳунарҳои гуногуни миллӣ маҳфилҳои ҳунаромӯзӣ, аз ҷумла рассомӣ, гулдӯзӣ, иншои беҳтарин ва дигар чорабиниҳо пайваста баргузор мешаванд. Дар ҳамин замина ба хотири боз ҳам афзун намудани сатҳи иштирокчиёни озмунҳои ҷумҳуриявӣ дар соҳаи маориф низ тадбирҳои амалӣ андешида шуда, ҷиҳати фароҳамсозии шароити таълиму тарбия ва аз худ намудани илмҳои муосир корҳои назаррас анҷом дода шудаанд.

АКС: АМИТ «Ховар»