Манучеҳр Сафаров ба дастаи футболи «Нефтчӣ»-и Фарғонаи Узбекистон гузариш намуд

ДУШАНБЕ, 11.12.2023. /АМИТ «Ховар»/. Ҳимоятгари дастаи мунтахаби Тоҷикистон Манучеҳр Сафаров фаъолияти худро дар Суперлигаи Узбекистон дар ҳайати дастаи футболи «Нефтчӣ»-и Фарғона идома медиҳад. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Манучеҳр Сафаров бо дастаи футболи «Нефтчӣ»-и Фарғонаи Узбекистон шартномаи дусола баст. Дар ин даста Манучеҳр Сафаров бо ҳимоятгари дигари дастаи мунтахаби Тоҷикистон Зоир Ҷӯрабоев, ки ахиран шартномаашро бо дастаи «Нефтчӣ» тамдид намуд, бозӣ менамояд.

Хотиррасон мешавем, ки ҳимоятгари дастаи мунтахаби Тоҷикистон мавсими 2023-ро дар ҳайати дастаи «Локомотив», дар Про-Лигаи Узбекистон гузаронида, 13 бозӣ анҷом дода, як гол задааст.

Қаблан Манучеҳр Сафаров дар дастаҳои футболи «Барқчӣ», «Хуҷанд», «Локомотив-Помир», «Истиқлол» ва «Персеполис»-и Эрон ҳунарнамоӣ намудааст.

Манучеҳр Сафаров аз соли 2019 дар дастаи мунтахаби Тоҷикистон бозӣ намуда, дар ин муддат 30 бозӣ анҷом додааст.

АКС: Федератсияи футболи Тоҷикистон