Сокинони ноҳияи Рӯдакӣ Паёми Президенти Ҷумҳурии Тоҷикистонро хушнудона истиқбол намуданд

РӮДАКӢ, 28.12.2023. /АМИТ «Ховар»/. Имрӯз сокинон ва кормандони ташкилоту муассисаҳои ноҳияи Рӯдакӣ дар зиёда аз 160 ҷойи ҷамъиятӣ ва ташкилоту муассисаҳои  ноҳия пахши мустақими телевизионии Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилию хориҷии Ҷумҳурии Тоҷикистон»-ро тамошо намуда, аз он руҳу илҳоми тоза гирифтанд. Дар ин хусус хабарнигори минтақавии АМИТ «Ховар» Субҳониддини Маҳмуд иттилоъ медиҳад.

Дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон тамоми самтҳои асосии фаъолияти мамлакат барои давраҳои оянда муайян гардида, оид ба пешбурди сиёсати хориҷӣ ва таъмини пешрафти соҳаҳои иқтисоду саноат, энергетика, роҳу нақлиёт, амнияту мудофиа, ҳифзи ҳуқуқу тартибот, тандурустӣ, фарҳанг, илму маориф, ҳифзи иҷтимоии аҳолӣ, ҷавонон, варзиш, сайёҳӣ ва ғайраҳо вазифаҳои мушаххас ба миён гузошта шуданд.

Масъулини Мақомоти иҷроияи ҳокимияти давлатии ноҳияи Рӯдакӣ иброз доштанд, ки Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии Ҷумҳурии Тоҷикистон фарҳанги миллиро  омили асосии тарбияи маънавию ахлоқии ҷомеа ва муаррифи таърих арзёбӣ намуданд.

Пешвои миллат  тазаккур доданд, ки аз ҷониби Ҳукумати Тоҷикистон вобаста ба таъриху фарҳанг ва тамаддуни миллати куҳанбунёди тоҷик дар дохили мамлакат ва дар арсаи байналмилалӣ иқдоми зиёде амалӣ мегарданд. Ҳифзи мероси фарҳанги моддиву ғайримоддии миллати бостониамон, ки гувоҳи зиндаи таърихи шашҳазорсолаи халқамон мебошад, вазифаи муҳимтарини мо,  ворисони ин мероси бузург ба ҳисоб меравад.

Сардори нозироти андози ноҳияи Рӯдакӣ Дилшод Ҳакимзода гуфт, ки «Паёми навбатии Пешвои миллат муҳтарам Эмомалӣ Раҳмон  дастурамали босамари фаъолияти давлат ва ҷузъи муҳими стратегияи давлатдорӣ  дар самти сиёсати дохилию хориҷӣ маҳсуб шуда, он доираи фарохи масъалаҳои сиёсию иқтисодӣ ва иҷтимоию фарҳангиро дар бар гирифта, самти рушди давлатро барои солҳои оянда муайян менамояд. Бо ташаббуси Пешвои миллат муҳтарам   Эмомалӣ Раҳмон ҳимояи манфиатҳои иқтисодиву иҷтимоӣ ва амнияти мамлакат, ҷалби сармояи хориҷӣ ҷиҳати татбиқи лоиҳаҳои бузурги инфрасохтори бозор, муҳайё намудани шароити мусоиди иқтисодию иҷтимоӣ барои сокинони мамлакат сол аз сол беҳтар гардида, лоиҳаҳои наву барномаҳои давлатӣ амалӣ мешаванд».

АКС: АМИТ «Ховар»