Аъзои гурӯҳҳои корӣ бо сокинони шаҳри Роғун оид ба нуктаҳои Паёми Президенти Тоҷикистон ба Маҷлиси Олӣ суҳбат менамоянд

РОҒУН, 15.01.2024 /АМИТ «Ховар»/.  Дар толори Қасри фарҳанги шаҳри  Роғун бо иштироки раиси шаҳр ва роҳбарони мақомоти ҳифзи ҳуқуқ вохӯрии судманд баргузор гардид, ки зимни он сокинони маркази шаҳр аз нуктаҳои асосии Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон  «Дар бораи самтҳои асосии сиёсати дохилӣ ва хориҷии ҷумҳурӣ» огоҳ гардиданд. Дар ин хусус хабарнигори минтақавии АМИТ «Ховар» Субҳониддини Маҳмуд иттилоъ дод.

Дар ҷамъомад иброз гардид, ки Паёми Президенти Ҷумҳурии Тоҷикистон ба Маҷлиси Олӣ идомаи мантиқии паёмҳои солҳои пешин буда, роҳи рушду пешрафти моро барои ояндаи наздик муайян месозад. Бо шарофати заҳмати содиқонаи мардуми мамлакат раванди созандагиву ободкорӣ бомаром идома ёфта, нақшаву барномаҳои пешбинигардида ҷиҳати таъмини рушди устувори иқтисоди миллӣ ва баланд бардоштани сатҳу сифати зиндагии сокинони мамлакат ҳадафмандона амалӣ шуданд.

Ҳамчунин гуфта шуд, ки  Президенти Ҷумҳурии Тоҷикистон муҳтарам Эмомалӣ Раҳмон  дар робита ба сохтмони аср- НБО «Роғун», ки дар ҷумҳурӣ аз ҷумлаи иншооти бузурги саноатӣ ба шумор меравад, чунин изҳор доштанд: «Мо тасмим гирифтаем, ки соли 2025 агрегати сеюми Неругоҳи барқи обии «Роғун»-ро ба истифода диҳем. Ҳоло дар ин иншооти муҳими аср 15 ҳазор мутахассису коргар ва 3500 техникаи сохтмонӣ фаъолият доранд».

Президенти Тоҷикистон изҳор намуданд, ки бо ин мақсад соли 2023 аз ҳисоби буҷети давлатӣ беш аз 5 миллиард сомонӣ равона гардид. Бояд гуфт, ки борои сокинони шаҳри Роғун шарафи бузург аст, ки дар бунёди ин иншооти аср саҳми арзанда мегузоранд ва кормандони ин иншооти бузургро меҳмоннавозӣ менамоянд.

Дар ҷамъомад масъулин оид ба Соли маърифати ҳуқуқӣ эълон  гардидани соли 2024,  рушди соҳаҳои маориф ва тандурустӣ, баланд бардоштани сатҳу сифати зиндагии мардум, пешрафти устувори минбаъдаи иҷтимоиву иқтисодии мамлакат, беҳтар гардонидани хизматрасонии давлатӣ дар шакли электронӣ, дастгирии фаъолияти соҳибкорию сармоягузорӣ, рушди соҳаҳои саноату сайёҳӣ, ҳифзи иҷтимоии аҳолӣ ва пешгирии шомилшавии ҷавонон ба гурӯҳҳои ифротӣ сухан гуфтанд.

Ёдовар мешавем, ки дар асоси нақшаи чорабиниҳои Мақомоти иҷроияи ҳокимияти давлатии шаҳри Роғун  4 гурӯҳи корӣ  иборат аз вакилону фаъолон таъсис шудааст. Гурӯҳҳо дар ҷамоатҳои шаҳраку деҳоти шаҳр  бо сокинони деҳаву маҳаллаҳо суҳбату мулоқоти судманд баргузор менамоянд.

АКС: Мақомоти иҷроияи ҳокимияти давлатии шаҳри Роғун