Бар асари ду таркиш дар Эрон 103 нафар ба ҳалокат расид

ДУШАНБЕ, 04.01.2024 /АМИТ «Ховар»/.  Дар натиҷаи ду таркиш, ки рӯзи чоршанбе дар наздикии ҷои дафни фармондеҳи собиқи қисми махсуси Сипоҳи посдорони инқилоби исломӣ генерал Қосим Сулаймонӣ рух дод, 103 нафар ҳалок ва 211 тани дигар захмӣ шуданд. Дар ин хусус агентии расмии иттилоотии Эрон IRNA ва агентии иттилоотии нимрасмии «Форс» иттилоъ дода, таркишҳоро ҳамлаҳои террористӣ номиданд.

Таркишҳо дар ҳамон лаҳзае рух доданд, ки садҳо нафар дар қабристони шаҳри Кирмон дар ҷанубу шарқи Эрон ба хотири гиромидошти хотираи Қосим Сулаймонӣ, ки чаҳор сол пеш ҳалок шуда буд, ҷамъ омаданд.

Ба гузориши хабаргузории ИРНА, таркиши аввал тақрибан дар масофаи 700 метр аз макони дафни Қосим Сулаймонӣ ва дуввумӣ дар як километр дуртар аз он рух додааст.

Муовини ҳокими вилояти Кирмон оид ба масъалаҳои сиёсӣ ва амниятӣ Раҳмон Ҷалолӣ изҳор дошт, ки таркишҳоро террористон ташкил намудаанд, иттилоъ медиҳад IRNA.

Намояндаи расмии Созмони миллии ёрии таъҷилии тиббии Эрон Бобак Яктопараст ба шабакаи хабарии Ҷумҳурии Исломии Эрон (IRINN) хабар дод, ки баъзе аз захмиён дар ҳолати вазнин қарор доранд, бинобар ин шумораи ҳалокшудагон метавонад афзоиш ёбад.

Мувофиқи иттилои IRINN, дар айни замон сабаби ҳодиса маълум мешавад ва дар ҷои ҳодиса гурӯҳҳои наҷотдиҳанда қарор доранд. Аксари ҷароҳатҳо ба зарардидагон аз сабаби зичии бисёр ва ҳаросонии одамон расидаанд.

Азиза ИКРОМ,
АМИТ «Ховар»

АКС: Anadolu via Getty Images