Дар «Роҳи оҳани Тоҷикистон» масъалаи тақвияти ҳаҷми мусофирбарӣ ва боркашонӣ баррасӣ гардид

ДУШАНБЕ, 09.01.2024. /АМИТ «Ховар»/. Дар Корхонаи Воҳиди Давлатии  «Роҳи оҳани Тоҷикистон»  доир ба ҷамъбасти натиҷаҳои соли 2023 ва вазифаҳо барои соли 2024  ҷаласа доир шуд. Дар он масъалаи тақвияти ҳаҷми мусофирбарӣ ва боркашонӣ, иҷрои нишондиҳандаҳои Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ»  дар бахши роҳи оҳан мавриди баррасӣ қарор гирифт. Дар ин хусус АМИТ «Ховар» хабар медиҳад.

Таъкид гардид, ки дар Паёми  Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон дар баробари арзёбии соҳаҳои гуногуни иқтисоди мамлакат ба соҳаи роҳу нақлиёт, хусусан роҳи оҳан дахл карда шуд.

Президенти Тоҷикистон таъкид намуданд, ки бо мақсади раҳо намудани ҷумҳурӣ аз бунбасти коммуникатсионӣ ва ба давлати транзитӣ табдил додани он Ҳукумати Тоҷикистон аз нахустин солҳои соҳибистиқлолӣ бо вуҷуди вазъи душвори иқтисодиву молиявӣ тамоми захираву имкониятро ба он равона намуд.

Тавре дар Паёми  Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон  таъкид гардид, дар даврони соҳибистиқлолӣ дар Тоҷикистон 58 лоиҳаи сармоягузории давлатӣ дар самти сохтмону таҷдиди роҳҳои мошингард ва роҳи оҳан, бунёди инфрасохтори онҳо ва таҳкими иқтидори техникии соҳа ба маблағи 26,6 миллиард сомонӣ амалӣ гардида, ҳоло корҳо дар ин самт бомаром идома доранд.

Ин дар ҳоле аст, ки Пешвои миллат таъкид намуданд, ки ояндаи наздик роҳҳои Тоҷикистон ба сифати долони транзитӣ ва иқтисодии Чин – Тоҷикистон – Афғонистон ва Чин – Тоҷикистон – Узбекистон – Туркманистон – Эрон – Туркия – Аврупо, инчунин Тоҷикистон – Чин – Покистон истифода мешаванд.

Таъкид гардид, ки роҳи оҳани Тоҷикистон бо шарофати ғамхории доимии Ҳукумати мамлакат, хусусан дастгириҳои пайвастаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар даврони соҳибистиқлолӣ ба дастовардҳои зиёди соҳавӣ ноил гардида, дар татбиқи нақшаву барномаҳои давлатӣ ва ҳадафҳои стратегии мамлакат нақши назарррас мегузорад.

Дар ҷаласа таъкид шуд, ки минбаъд низ роҳиоҳанчиён бо мақсади рушди соҳа ва дар маҷмуъ дар  пешрафти иқтисодиёти миллӣ саҳми назаррас гузошта, дар ояндаи наздик татбиқи лоиҳаҳои азими созандагиро ба нақша мегиранд.

АКС: КВД «Роҳи оҳани Тоҷикистон»