Байни Донишгоҳи давлатии омӯзгории Тоҷикистон ва Донишкадаи давлатии омӯзгории Шаҳрисабзи Узбекистон созишномаи ҳамкорӣ ба имзо расид

ДУШАНБЕ, 15.02.2024. /АМИТ «Ховар»/. Байни Донишгоҳи давлатии омӯзгории Тоҷикистон ба номи Садриддин Айнӣ ва Донишкадаи давлатии омӯзгории Шаҳрисабзи Ҷумҳурии Узбекистон ба таври маҷозӣ созишномаи ҳамкорӣ баста шуд. Дар ин хусус ба АМИТ «Ховар» дар Донишгоҳи давлатии омӯзгорӣ хабар доданд.

Ҳуҷҷати ҳамкорӣ аз тарафи ректори Донишгоҳи давлатии омӯзгории Тоҷикистон ба номи Садриддин Айнӣ, профессор Аҳлиддин Ибодуллозода ва ректори Донишкадаи давлатии омӯзгории Шаҳрисабз Ҷамшед Шоназаров дар шакли маҷозӣ ба имзо расонида шуд.

Тибқи бандҳои созишнома, рушди табодули таҷрибаомӯзии омӯзгорон ва ба таҳсил фаро гирифтани донишҷӯён, фаъолияти муштараки илмӣ, ташкил ва баргузор намудани конференсияҳо, амалӣ намудани нашри маводи илмӣ ва дигар фаъолияти муҳими илмӣ-фарҳангӣ, ки ба манфиати ҷонибҳо мебошад, амалӣ  мешавад.

Донишгоҳи давлатии омӯзгории Тоҷикистон ба номи Садриддин Айнӣ феълан ҳамкории судмандро бо 111 муассисаи олӣ ва олии касбии ватаниву хориҷӣ дар самти илмиву таълимӣ ва мубодилавию фарҳангӣ амалӣ намуда, тасмим гирифтааст, ки дар оянда ҳамкориро бо муассисаҳои бонуфузи дунё тавсеа бахшад.

АКС: Донишгоҳи давлатии омӯзгории Тоҷикистон ба номи Садриддин Айнӣ