Хушкмеваҳои Тоҷикистон дар «Gulfood» ба намоиш ва фурӯш гузошта шуданд

ДУШАНБЕ, 20.02.2024 /АМИТ «Ховар»/. Шаш корхонаи коркарди хушкмеваҳо аз Тоҷикистон: «Баракат Исфара», «Оро Исфара», «Исфара Фуд», «Субҳи ватан», «Висол» /шаҳри Исфара/, «Насим» /Хоруғ/, инчунин Ассотсиатсияи байналмилалии истеҳсолкунандагон ва содироткунандагони маҳсулоти кишоварзии Тоҷикистон дар намоишгоҳи бонуфузи «Gulfood» дар шаҳри Дубайи Амороти Муттаҳиддаи Араб хушкмеваҳои Тоҷикистонро ба намоиш ва фурӯш гузоштанд. Намоишгоҳи «Gulfood» 19 феврал оғоз ёфта, то 23 феврал идома меёбад, хабар медиҳад АМИТ «Ховар» бо истинод ба Маркази тиҷорати байналмилалӣ.

Иштироки корхонаҳои Тоҷикистон дар намоишгоҳи бонуфуз дар доираи лоиҳаи Маркази тиҷорати байналмилалӣ – «Пешбурди тиҷорат дар Шарқ: давлатҳои Балкан ва Осиёи Марказӣ» (TPE) амалӣ гардид.

Намоишгоҳ барои корхонаҳои коркарди хушкмеваи тоҷик имкони хубе фароҳам меорад, то маҳсулот ва имконияташонро муаррифӣ ва тарғиб намоянд, ҳамкории эҳтимолии тиҷоратиро баррасӣ намуда, дар минтақа бо раванд ва тамоюлоти нави бозор шинос шаванд.

Роҳбари миллии лоиҳаи Маркази тиҷорати байналмилалӣ дар Тоҷикистон Саидмӯъмин Камолов мегӯяд: «Иштирок дар «Gulfood» намунаи талошҳои Марказ ҷиҳати тавсеаи бозорҳои нави фаромарзӣ барои хушкмеваҳои Тоҷикистон мебошад. Бо намоиши маҳсулоти хушсифати гуногун дар намоишгоҳи бонуфуз ширкатҳои мо азм гирифтаанд, ки шарикони эҳтимолии байналмилалиро аз байни истеҳсолкунандагон ва харидорон ҷалб намуда, ҳамкории тиҷоратиро ба нафъи мамлакат рушд диҳанд».

«Gulfood» соли 29-ум аст, ки баргузор ва яке аз намоишгоҳҳои бузургтарини тиҷоратӣ дар саноати хӯрокворӣ маҳсуб мешавад.     «Gulfood» коршиносони пешсафи соҳа ва харидоронро аз саросари ҷаҳон ҷиҳати табодули идеяҳо, тавсеаи равобити тиҷоратӣ ва барқарор намудани ҳамкории стратегӣ гирди ҳам меорад.

 АКС аз манбаъҳои боз