Миқдори безарари кофеин барои як рӯз муайян гардид

ДУШАНБЕ, 25.02.2024 /АМИТ «Ховар»/. Яке аз нӯшокиҳои маъмул дар ҷаҳон чой ба ҳисоб меравад. Алалхусус ду навъи он-сиёҳ ва сабз аз ҳама машҳуртарин маҳсуб мешаванд. Ба гуфтаи мутахассиси ғизошинос Вероника Гусакова, кам нафароне ҳастанд, ки дар бораи безарар будани нӯшокӣ, махсусан миқдори кофеин дар он андеша намоянд. Дар ин хусус  АМИТ «Ховар» бо истинод ба сарчашмаҳои хориҷӣ иттилоъ медиҳад.

Ҳам чойи сиёҳ ва ҳам сабз дар таркибашон кофеин доранд: дар таркиби намуди аввал он аз 40 то 70 граммро дар як пиёла чой ва дар намуди дуюмӣ аз 20 то 25 граммро ташкил медиҳад. Зимнан агар меъёри аниқи онро муайян намудан хоҳем, он набояд беш аз 400 грамм бошад, вале ин андоза барои ҳар фард гуногун аст. Гусакова таъкид менамояд, ки ин нӯшокӣ ба кӯдакон хатар дошта, дилхоҳ намуди он ба онҳо таъсири зараровар дорад.

Табиб баён дошт, ки истеъмоли аз меъёр зиёди кофеин нишонаҳои зерин: изтироб, дарди меъда, ларзиш, зиёд ҷудо шудани арақи бадан, бехобӣ, дарди сар, набзи тези дилро ба амал меорад. Ба ин хотир  баъзе нафаронро зарур аст, ки истеъмоли ин нӯшокиро кам намоянд ва ё онро тамоман нанӯшанд. Ба гурӯҳи осебпазир занҳои ҳомила, гирифторони бемории дилу рагҳо, нафароне, ки аз бехобӣ азият мекашанд ва одамоне, ки аз дарди меъда шикоят доранд, дохил мешаванд.

АКС аз манбаъҳои боз