ТАРБИЯИ ВАТАНДӮСТИИ ШАҲРВАНДОН. Бо ин мақсад дар шаҳри Хуҷанд ҳамоиш доир шуд

ДУШАНБЕ, 24.03.2024. /АМИТ «Ховар»/. Дар Донишгоҳи техникии Тоҷикистон ба номи академик Муҳаммад Осимӣ дар шаҳри Хуҷанд доир ба татбиқи сиёсати давлатии ҷавонон ва тарбияи ватандӯстии шаҳрвандон таҳти унвони «Тарбияи ватандӯстии шаҳрвандон – омили таҳкими пояҳои давлатдории миллӣ» вохӯрӣ доир шуд. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Таъкид шуд, ки тарбияи ҷавонон дар руҳияи маърифатандӯзӣ, меҳанпарастӣ ва дар амал татбиқ намудани суханҳои созандаи Пешвои миллат сабаб мегардад, ки мардуми шарифи Тоҷикистон дар шинохти зарфияти таърихиамон беш аз пеш муваффақ гарданд ва бо дастовардҳои назаррас мамлакатамонро бештар дар арсаи ҷаҳон муаррифӣ намоянд. Сарвари давлат борҳо таъкид менамоянд, ки «мо бояд хонем, илм омӯзем, илмҳои дақиқу риёзиро рушд диҳем, техникаву технологияҳои навтаринро аз худ кунем, кадр тарбия намоем ва заҳмат кашем, то зиндагии имрӯзаамон нисбат ба дирӯз ва фардоямон нисбат ба имрӯз беҳтар гардад».

Ҳамзамон иштирокчиён  бинобар Соли маърифати ҳуқуқӣ эълон гардидани соли 2024, ғолибияти дастаи миллии мамлакат, ба «мамлакати сабз» табдил додани Тоҷикистон ва муаррифии Тоҷикистон дар арсаи байналмилалӣ табодули афкор намуданд.

Аз ҷавонон даъват шуд, ки бо истифода аз имконоту шароити муҳайёнамудаи давлату ҳукумат ба омӯзиши забонҳои хориҷӣ ва азхудкунии илмҳои дақиқ машғул шаванд. Ҳамзамон дар рушду тараққии минбаъдаи давлат саҳми муносиб гузоранд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон