БО УСУЛИ «ХОНА БА ХОНА». Дар шаҳри Левакант суҳбат ва корҳои фаҳмондадиҳӣ гузаронида шуданд

ДУШАНБЕ, 14.04.2024 /АМИТ «Ховар»/.  Дар кӯчаву маҳаллаҳои шаҳри Левакант бо усули «Хона ба хона» корҳои фаҳмондадиҳӣ ва тарғиботӣ гузаронида шуданд. Дар ин хусус АМИТ «Ховар» бо истинод ба хадамоти матбуоти Раиси вилояти Хатлон хабар медиҳад.

Гурӯҳи корӣ бо роҳбарии муовини раиси вилоят Анзурат Абдусаломзода дар кӯчаву маҳаллаҳои шаҳри Левакант бо мардум вохӯриву суҳбатҳо анҷом дод.

Ҳадаф аз вохӯрӣ- огоҳ шудан аз вазъи зиндагии мардум, мушкилоти иҷтимоӣ, кумак ба оилаҳои ниёзманд аз ҳисоби Фонди хайриявии Мақомоти иҷроияи ҳокимияти давлатии вилояти Хатлон, пешгирии гаравидани ҷавонон ба ҳизбу ҳаракатҳои иртиҷоӣ, таълимоти ғайрирасмии динӣ, инчунин ҷалби ҷавонон ба хизмати ҳарбӣ, истифодаи самараноки заминҳои наздиҳавлигӣ ва гулшинонию сабзкорӣ, риояи қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросими миллӣ» буд.

Ин ҳама корҳои фаҳмондадиҳӣ аз дастуру ҳидоятҳои Пешвои муаззами миллат зимни вохӯрӣ бо фаъолон ва ходимони дини мамлакат маншаъ мегиранд.

АКС: Хадамоти матбуоти Раиси вилояти Хатлон