Президенти Ҷумҳурии Тоҷикистон Эмомалӣ Раҳмон бо Президенти Ҷумҳурии Италия Серҷо Маттарелла мулоқот намуданд

Апрель 23, 2024 16:54

ДУШАНБЕ, 23.04.2024 /АМИТ «Ховар»/. 23 апрел Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Италия муҳтарам Серҷо Маттарелла мулоқот намуданд.

Маросими истиқболи расмии Президенти Ҷумҳурии Тоҷикистон муҳтарам Эмомалӣ Раҳмон дар назди Қасри Президенти Италия “Квиринал” баргузор шуд.

Меҳмони олимақом — Пешвои миллат муҳтарам Эмомалӣ Раҳмонро дар саҳни Қасри «Квиринал» Президенти Ҷумҳурии Италия самимона истиқбол гирифт.

Президенти Ҷумҳурии Тоҷикистон ва Президенти Ҷумҳурии Италия дар болои қолин қарор гирифтанд ва сурудҳои миллии ду давлат садо доданд.

Дар ин маврид дар болои боми Қасри «Квиринал» Парчами давлатии Ҷумҳурии Тоҷикистон бардошта шуд.

Пас аз анҷоми сурудҳои миллии ду давлат Фармондеҳи Қаровули фахрӣ ба меҳмони олиқадр гузориш дод.

Зимни ҳаракати роҳбарони ду давлат аз назди қаровули фахрӣ Президенти Ҷумҳурии Тоҷикистон дар назди парчами Ҷумҳурии Италия таваққуф карда, арзи эҳтиром намуданд.

Маросими истиқболи расмӣ бо шиносии сарони давлатҳо бо ҳайатҳои расмии ду ҷониб поён ёфт.

Баррасии масоили ҳамкории Тоҷикистон ва Италия дар Қасри «Квиринал» дар мулоқоти хоссаи сарони давлатҳо оғоз гардида, бо иштироки ҳайатҳои ҳарду ҷониб идома ёфт.

Президенти Ҷумҳурии Тоҷикистон муҳтарам Эмомалӣ Раҳмон ба Президенти Ҷумҳурии Италия барои даъват баҳри анҷом додани сафари расмӣ ва пазироии гарму самимӣ изҳори сипос намуданд.

«Мо Ҷумҳурии Италияро шарики муҳим ва боэътимоди худ дар Аврупо медонем», — таъкид доштанд Сарвари давлати Тоҷикистон муҳтарам Эмомалӣ Раҳмон дар оғози суҳбат.

Ҷонибҳо зимни музокирот маҷмуи масоили ҳамкории байни ду давлат ва густариши робитаҳо дар соҳаҳои сиёсӣ, иқтисодию тиҷоратӣ, инчунин имконоти татбиқи лоиҳаҳои муштараки сармоягузориро баррасӣ намуданд.

Баҳрабардорӣ аз таҷрибаи ғании Италия, бахусус дар соҳаҳои гидроэнергетика, саноати сабук, хӯрокворӣ, дорусозӣ, истихроҷи маъдан, истифодаи захираҳои табиӣ ва кишоварзӣ аз самтҳои афзалиятноку барои ҷонибҳо судовар номида шуд.

Таъкид гардид, ки таъсиси Шурои муштараки тиҷоратӣ барои густариши ҳамкории ҷонибҳо дар бахши хусусӣ иқдоми саривақтӣ хоҳад буд.

Зимни мулоқот масоили дарёфти роҳҳои нави ҳамкорӣ дар самти рафтуомади шаҳрвандон ва таъсиси хатсайри мустақими ҳавоӣ байни ду давлат баррасӣ гардид.

Дар ин ҷода роҳбарони 2 давлат имзо шудани Созишнома дар бораи лағви раводид барои дорандагони шиносномаҳои дипломатиро дар доираи ин сафар иқдоми муҳим арзёбӣ намуданд.

Ҷонибҳо оид ба рушди бахши сайёҳӣ ва инфрасохтори он, робитаҳои фарҳангию гуманитарӣ ва ҷалби ҷавонон ба таҳсил дар муассисаҳои олии Италия табодули афкор намуданд.

Зикр карда шуд, ки парлумонҳои ду давлат дар чаҳорчӯби Парлумони Аврупо ҳамкории судманд доранд ва барои ҷоннок кардани он таъсиси гурӯҳи дуҷонибаи дӯстии парлумонии Тоҷикистон ва Италия амри зарурӣ аст.

Дар ҷараёни вохӯрӣ масоили ҳамкории давлатҳо дар доираи ташкилоту созмонҳои бонуфузи олам, аз қабили СММ, САҲА ва дигар сохторҳои байналмилалӣ муҳокима гардид.

Дар ҷараёни мулоқот ташаббусҳои глобалии Тоҷикистон дар ҳалли масоили обу иқлим, ҳифзу таҳкими амнияти минтақавӣ ва байналмилалӣ таъкид гардид.

Зимни баррасии масоили амниятӣ ҷонибҳо оид ба роҳҳои муборизаи босамар бар зидди терроризм, ифротгароӣ ва ҷиноятҳои муташаккили фаромиллӣ, аз ҷумла қочоқи маводи мухаддир ва ҷиноятҳои киберӣ андешаронӣ намуданд.

Дар фароварди мулоқот Президенти Ҷумҳурии Тоҷикистон аз Президенти Ҷумҳурии Италия даъват ба амал оварданд, ки бо сафари расмӣ ба Тоҷикистон ташриф орад.

Мулоқот бо Президенти Ҷумҳурии Италия Серҷо Маттарелла 23.04.2024

Апрель 23, 2024 16:54

Хабарҳои дигари ин бахш

Суханронии Президенти Ҷумҳурии Тоҷикистон, Пешвои миллат Эмомалӣ Раҳмон дар мулоқот бо аҳли илм ва маорифи кишвар
Пешвои миллат Эмомалӣ Раҳмон бо аҳли илм ва маорифи мамлакат мулоқот анҷом доданд
Сарвари давлат Эмомалӣ Раҳмон дар ҷамъомади тантанавӣ ба ифтихори 30-солагии Рӯзи таъсисёбии Қӯшунҳои сарҳадӣ иштирок намуданд
Суханронии Президенти Ҷумҳурии Тоҷикистон Эмомалӣ Раҳмон ба ифтихори 30-юмин солгарди рӯзи таъсисёбии Қӯшунҳои сарҳадӣ
Пешвои миллат Эмомалӣ Раҳмон дар паради ҳарбӣ бахшида ба 30-солагии Қӯшунҳои сарҳадӣ иштирок намуданд ва бо фаъолияти марзбонон шинос шуданд
Суханронии Президенти Ҷумҳурии Тоҷикистон Эмомалӣ Раҳмон дар Паради ҳарбӣ ба муносибати 30-юмин солгарди таъсисёбии Қӯшунҳои сарҳадӣ
Сарвари давлат Эмомалӣ Раҳмон бо гузоштани санги асос ба сохтмони 5 бинои истиқоматии 16-ошёна барои афсарони Қӯшунҳои сарҳадӣ оғоз бахшиданд
Сарфармондеҳи Олии Қувваҳои Мусаллаҳи Ҷумҳурии Тоҷикистон Эмомалӣ Раҳмон бо шароити Қӯшунҳои сарҳадии Кумитаи давлатии амнияти миллӣ шинос шуданд
Президенти Ҷумҳурии Тоҷикистон Эмомалӣ Раҳмон Вазири корҳои дохилии Федератсияи Русия Владимир Колоколтсевро ба ҳузур пазируфтанд
Пешвои миллат Эмомалӣ Раҳмон ба як гурӯҳ хизматчиёни ҳарбӣ мукофотҳои давлатӣ ва рутбаҳои навбатии ҳарбӣ тақдим намуданд
Мубодилаи барқияҳои табрикии Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Қирғизистон Садир Жапаров
Сарвари давлат Эмомалӣ Раҳмон дар ноҳияи Данғара бо роҳбарон ва фаъолони вилояти Хатлон мулоқот доир намуданд