БАХШИДА БА РӮЗИ ҶАҲОНИИ ФУТБОЛ. Дар ноҳияи Шаҳристон толори варзишӣ ифтитоҳ гардид

ДУШАНБЕ, 24.05.2024 /АМИТ «Ховар»/. Дар доираи чорабиниҳо бахшида ба Рӯзи ҷаҳонии футбол, ки 25 май таҷлил мегардад, дар деҳаи Ваҳдати ноҳияи Шаҳристон толори варзишӣ ба истифода дода шуд. Дар ин хусус АМИТ «Ховар» бо истинод ба хадамоти матбуоти Раиси вилояти Суғд хабар медиҳад.

Дар маросими баистифодадиҳии иншооти варзишӣ, ки ба истиқболи 35-солагии Истиқлоли давлатии Ҷумҳурии Тоҷикистон бунёд гардидааст, иттилоъ дода шуд, ки ин толор дар назди Муассисаи таҳсилоти миёнаи умумии рақами 5 сохта шуда, туҳфаи арзанда ба хонандагон ва дӯстдорони варзиш аст.

Сохтмони иншоот соли 2021 оғоз ёфта, он бо дастгирии мақомоти иҷроияи маҳаллӣ ва сокинону соҳибкорон, инчунин саҳми нафароне, ки маблағи барои ҳаҷ ҷамъовардаи худро эҳдо намуданд, қомат афрохта, бо таҷҳизоти зарурӣ таъмин карда шудааст.

Толори варзишӣ мутобиқ ба талабот ва меъёрҳои замони муосир бунёд ёфта, барои машғул гаштан ба намудҳои гуногуни варзиш, аз қабили футбол, волейбол, баскетбол, тенниси рӯи миз, гӯштин, шашкаву шоҳмот ва ғайра пешбинӣ шудааст.

Ҳамчунин иншоот дорои утоқи корӣ, ҳуҷраи шустушӯ ва либосивазкунӣ мебошад.

Бояд гуфт, ки дар ноҳияи Шаҳристон варзишгарон ва дӯстдорони варзиш хеле зиёд буда, дастпарварони ноҳия дар мусобиқаҳои сатҳи ҷумҳуриявию байналмилалӣ шарафи ноҳия ва мамлакатро боло мебрадоранд. Чунончӣ, дастаи футболи духтаронаи ноҳия дар сатҳи ҷумҳуриявӣ сазовори ҷои аввал гардидааст.

Таъкид гардид, ки дар партави мулоқоти Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо фаъолон, намояндагони ҷомеа ва ходимони дин, ки 9 марти имсол баргузор гардид, сокинон, шахсони гуногункасб, алалхусус занону собиқадорон ба корҳои хайру савоб ва ободониву созандагӣ бештар машғул мешаванд. Ин аст, ки дар бунёди ин толори варзишӣ як гурӯҳ шаҳрвандон маблағи барои ҳаҷ пасандозкардаашонро сарф намуданд.

АКС: Хадамоти матбуоти Раиси вилояти Суғд