Дар Душанбе бо мақсади тавсеаи фаъолият дар самти кор бо занон ва оила ҷаласаи сайёр баргузор шуд

ДУШАНБЕ, 01.05.2024 /АМИТ «Ховар»/. Кумитаи кор бо занон ва оилаи назди Ҳукумати Ҷумҳурии Тоҷикистон дар якҷоягӣ бо Мақомоти иҷроияи ҳокимияти давлатии шаҳри Душанбе бо мақсади тавсеа бахшидани фаъолият дар самти кор бо занон ва оила, иҷрои барномаҳои соҳавӣ, тақвият бахшидани корҳои тарғиботию ташвиқотӣ ва коҳиш додани ҳолатҳои номатлуб дар ҷомеа бо аҳли ҷамоати шаҳри Душанбе ҷаласаи сайёр баргузор намуд. Дар ин хусус АМИТ «Ховар» бо истинод ба Кумитаи кор бо занон ва оила хабар медиҳад.

Дар ҷаласа ҳисоботи раёсати кор бо занон ва оилаи шаҳри Душанбе ва шуъбаву бахшҳои кор бо занон ва оилаи ноҳияҳои пойтахт оид ба фаъолияти соҳа дар семоҳаи аввали соли 2024 шунида шуд.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода ва муовини Раиси шаҳри Душанбе Дилбар Одилзода  баъди таҳлилу баррасии фаъолияти сохторҳои кор бо занон ва оила оид ба вусъат додани корҳо дар самти дастгирии занон, масъалаи омӯзонидани духтарон, пешгирии пошхӯрии оилаҳои ҷавон ва бартараф намудани камбудиҳои ҷойдошта сухан гуфта, ба масъулин дастурҳои мушаххас доданд.

АКС: Шуъбаи иттилоотии дастгоҳи Раиси шаҳри Душанбе