«ПИРӢ ФАРО РАСИДААСТ, ЧӢ БОЯД КАРД?». Таҳти чунин унвон китоб ба нашр расид

ДУШАНБЕ, 29.05.2024 /АМИТ «Ховар»/. «Пирӣ фаро расид. Чӣ бояд кард?»- таҳти чунин унвон китоби навбатии узви Конфедератсияи синамогарони Иттиҳоди Давлатҳои Мустақил ва Балтика, нависандаи тоҷик Абдурофеъ Рабизода (Шераки Ориён) нашр гардид.

Муаллифи китоб зимни суҳбат ба АМИТ «Ховар» иброз намуд, ки  «инсон ҳама чиро аз худ мекунад ба оҳистагӣ, ба фаҳми истифодаи ҳикмату таҷрибаи бардоштаи худаш мерасад ба оҳистагӣ, ба офаридгориву созандагӣ даст мезанад ба оҳистагӣ… Хуллас пирӣ баъзе чизҳои нодире дорад, ки синну соли дигар ва фаслҳои дигари умр надоранд…».

Муҳтавои китоби «Пирӣ фаро расидааст, чӣ бояд кард?» аз саргузаштҳо ва даркҳои инсонҳо дар охирин солҳои зистанашон қисса мекунад.

Ба қавли муаллиф, «пиронсолӣ низ як пораи умр аст, балки ҳосили умр ва ҳикмати умр, ки онро донистану фаҳмидан, хосса шаҳду талхиашро ба тасвир кашидан зарур аст».

Бояд гуфт, ки Абдурофеъ Рабизода (Шераки) Ориён узви Конфедератсияи синамогарони Иттиҳоди Давлатҳои Мустақил ва Балтика буда, муаллифи 42 филми бадеӣ ва санадию фалсафӣ мебошад. Эҷодиёти ӯ ҳафт ҷоизаи байналхалқиро сазовор гардидааст.

Асарҳояш ба зиёда аз чил забони хориҷӣ тарҷумаю нашр гардидаанд, аз ҷумла ба англисӣ, русӣ, фаронсавӣ, ҷопонӣ, чинӣ, ҳинду, урду, полякӣ, узбекӣ, қазоқӣ, украинӣ, беларусӣ, чехиву олмонӣ, арманиву гурҷӣ, испаниву арабӣ ва ғайра.

Филмҳои вай, ба мисли «Марди мутааллиқи ду зан», «Вақте болои шаҳр борон мерехт», «Дӯстонро намефурӯшанд», «Афсонаи зиндагӣ», «Чор фасли умр», «Насл» ва ғайра имрӯзҳо маъруфу машҳур гардидаанд.

Филми «Дӯстонро намефурӯшанд» («Аспи охирини шаҳр») аз ҷониби 28 кишвари ҷаҳон харидорӣ гардида, дар Кинофестивали Рига (соҳили Балтика) соҳиби ҷоиза гардида буд. Филми дигари Шераки Ориён «Марди мутааллиқи ду зан» дар даҳаи навади қарни бист дар кинофестивалҳои ЕврАзия, Фаронса, Амрико чор ҷоизаро сазовор гардид.

 АКС аз бойгонии Шераки Ориё