«ПУЛИ ЗАБОНИ ЧИНӢ». Хонандаи тоҷик Ёқубҷон Ғуломов ғолиби озмун дониста шуд

 ДУШАНБЕ, 09.05.2024. /АМИТ «Ховар»/. Дар Донишкадаи Конфутсийи назди Донишгоҳи миллии Тоҷикистон даври ниҳоии даъвати 17-уми озмуни ҷаҳонии «Пули забони чинӣ» байни хонандагони Тоҷикистон дар соли 2024 баргузор гардид. Дар ин хусус ба АМИТ «Ховар» дар Донишгоҳи миллии Тоҷикистон хабар доданд.

Таъкид шуд, ки омӯзиши забонҳои хориҷӣ дар замони муосир яке аз талаботи давр гардидааст. Ҳамасола ин озмуни ҷаҳонӣ баргузор карда мешавад, ки дар он донандагони забони Чин қобилияти забондонӣ ва ҳунару истеъдоди хешро ба намоиш гузошта, бо ин роҳ донишу малакаашонро такмил медиҳанд.

Озмуни ҷаҳонии “Пули забони чинӣ” чорабинии муҳим дар саросари ҷаҳон мебошад, ки аз соли 2002 бо дастгирии Маркази ҳамкории байналмилалии Чин бо хориҷи мамлакат дар самти забономӯзӣ баргузор мешавад.

Дар даври интихобии озмун 39 хонанда аз чанд муассисаи таҳсилоти миёнаи умумӣ иштирок намуда, 8 нафар ба даври ниҳоии озмун роҳ ёфтанд. Дар даври ниҳоии озмун пас аз рақобати шадид хонандаи синфи 11 аз Муассисаи таҳсилоти миёнаи умумии № 42-и шаҳри Душанбе Ёқубҷон Ғуломов ғолиби ҷои аввал, хонандаи  синфи 9 аз Муассисаи таҳсилоти миёнаи умумии № 43-шаҳри Душанбе Мазҳаб Наҷмиддинзода ғолиби ҷои дуюм ва хонандаи Муассисаи таҳсилоти миёнаи умумии № 1-и шаҳри Бустон Фарангиз Зоирова ғолиби ҷои сеюм гардиданд.

Ғолибони озмун бо Ифтихорнома ва мукофот қадрдонӣ гардиданд.

АКС: Донишгоҳи миллии Тоҷикистон