«РОҲ БА СӮИ ТИЁН-ШОН». Муҳимтарин масъалаҳои марбут ба роҳу нақлиёт дар конфронси байналмилалӣ баррасӣ шуданд

Май 29, 2024 15:01

ДУШАНБЕ, 29.05.2024 /АМИТ «Ховар»/. «Роҳ ба сӯи Тиён-Шон»- таҳти чунин унвон имрӯз дар пойтахти Тоҷикистон- шаҳри Душанбе конфронси байналмилалӣ оғоз гардид. Вазорати нақлиёти Тоҷикистон ва Комиссияи иқтисодӣ ва иҷтимоии Созмони Милали Муттаҳид /СММ/ барои Осиё ва Уқёнуси Ором /ЭСКАТО/ аз созмондиҳандагони конфронси байналмилалӣ мебошанд, иттилоъ медиҳад хабарнигори АМИТ «Ховар».

Дар конфронси байналмилалии «Роҳ ба сӯи Тиён-Шон» беш аз 300 намояндаи баландпояи мақомоти давлатии Осиёи Марказӣ, аъзои Иттиҳоди Аврупо, Созмони ҳамкории Шанхай, ЭСКАТО, ТРАСЕКА, Маркази байналмилалии дипломатияи нақлиётӣ, институтҳои байналмилалии молиявӣ, намояндагони корпуси дипломатии муқими Тоҷикистон, бахши хусусӣ ва ҷомеаи шаҳрвандӣ иштирок намуданд.

Зимни ифтитоҳи конфронси байналмилалии «Роҳ ба сӯи Тиён-Шон» Сарвазири Ҷумҳурии Тоҷикистон Қоҳир Расулзода тамоми иштирокдорони ин чорабинии сатҳи баландро барои ташрифашон ба сарзамини Тоҷикистон аз номи Ҳукумати Ҷумҳурии Тоҷикистон хайрамақдам гуфт.

Таъкид шуд, ки конфронси байналмилалии «Роҳ ба сӯи Тиён-Шон» ба 10-солагии имзои Созишнома байни ҳукуматҳои давлатҳои аъзои Созмони ҳамкории Шанхай «Дар бораи фароҳам овардани шароити мусоид барои ҳамлу нақли байналмилалии автомобилӣ» ва инчунин татбиқи Созишнома дар бораи таҳкими ҳаикорӣ дар соҳаи нақлиёти заминии давлатҳои Осиёи Марказӣ, ки дар ҳошияи мулоқоти Панҷуми машваратии сарони давлатҳои Осиёи Марказӣ 13 сентябри соли 2023 ба имзо расида буд, бахшида шудааст.


Дар ҷараёни конфронси байналмилалии «Роҳ ба сӯи Тиён-Шон» иштирокдорони он ҳолат ва дурнамои рушди долонҳои байналмилалии нақлиётӣ ва ҳамлу нақли мултимодалӣ, рушди инфрасохтори роҳу нақлиёт, барои беҳтар намудани бехатарии ҳаркат дар роҳ: расидан ба ҳадафҳои глобалӣ то соли 2030, тавсеаи робитаҳои нақлиётии давлатҳое, ки роҳи баромадан ба баҳр надоранд, ба бандарҳои баҳрии давлатҳои Осиё ва дигар масъалаҳои муҳими тақвияти ҳамкорӣ дар соҳаи роҳу нақлиётро баррасӣ намуданд.

Дар доираи конфронс вохӯрии кории вазирони нақлиёти давлатҳои аъзои Созмони ҳамкории Шанхай тибқи Созишнома байни ҳукуматҳои кишварҳои аъзои Созмони ҳамкории Шанхай «Дар бораи фароҳам овардани шароити мусоид барои ҳамлу нақли байналмилалии автомобилӣ», мулоқоти вазирони нақлиёти Осиёи Марказӣ+Чин барои баррасии равандҳо ва вазифаҳои ҷорӣ ва минбаъда, аз ҷумла татбиқи Созишнома оид ба таҳким дар соҳаи нақлиёти заминии давлатҳои Осиёи Марказӣ доир гардиданд.

 

АКС: АМИТ «Ховар»

Май 29, 2024 15:01

Хабарҳои дигари ин бахш

Конфронси Гурӯҳи корӣ оид ба ҳамкории авиатсияи граждании Чин ва Осиёи Марказӣ (C5+1) баргузор гардид
НАМОИШГОҲИ БАЙНАЛМИЛАЛИИ САВДО «СУҒД-2024». Вилояти Суғд бо зиёда аз 60 давлати ҷаҳон робитаҳои иқтисодӣ дорад
Дар панҷ моҳ дар Тоҷикистон беш аз 1411 тонна моҳӣ истеҳсол шудааст
Масъалаи зиёд намудани парвозҳои транзитӣ бо истифода аз роҳи ҳавоии мустақими байни Тоҷикистон ва Чин баррасӣ гардид
Имконияти сармоягузорӣ ва зарфиятҳои иқтисодии Тоҷикистон барои соҳибкорони Швейтсария муаррифӣ шуд
САҲМИ ПЕШВОИ МИЛЛАТ ДАР РУШДИ ИҚТИСОДИ РАҚАМӢ. Дар ин мавзуъ дар Донишгоҳи миллӣ ҳамоиш доир шуд
СУҒД ВОДИИ ИМКОНИЯТҲО. Суратгузориш аз даҳумин Ярмаркаи байналмилалии савдо «Суғд-2024»
ЯРМАРКАИ БАЙНАЛМИЛАЛИИ САВДО «СУҒД-2024». Дар доираи он тавсеаи равобит дар соҳаҳои илму маориф ва фарҳанг баррасӣ шуд
Дар Душанбе таҳияи барномаи ҳамкории Тоҷикистон бо Фонди байналмилалии рушди кишоварзӣ баррасӣ гардид
Бонки миллии Тоҷикистон ва Дафтари ҳамкории иқтисодии Швейтсария ҳамкориро тақвият мебахшанд
Корхонаи хурди «Зари тоҷик» дар шаҳри Гулистон аз металлҳои қиматбаҳо маҳсулоти заргарӣ истеҳсол менамояд
Ҷамъияти дорои масъулияти маҳдуди «Пахтаи Кӯлоб» имсол дар 1900 гектар пахта кишт намудааст