Сомон Турсунзода дар Мусобиқаи байналмилалӣ оид ба ҷиу-ҷитсу дар Узбекистон соҳиби медали тилло гардид

Май 20, 2024 19:43

ДУШАНБЕ, 20.05.2024 /АМИТ «Ховар»/. Дар шаҳри Тошканди Ҷумҳурии Узбекистон мусобиқаи байналмилалӣ оид ба варзиши ҷиу-ҷитсу баргузор гардид, ки дар он варзишгари навраси тоҷик Сомон Турсунзода дар вазни 27 кг бар ҳамаи ҳарифонаш ғолиб омада, сазовори медали тилло шуд. Дар ин хусус Директори Муассисаи давлатии «Мактаби ҷумҳуриявии маҳорати олии варзишӣ оид ба варзиши сабук» Раҷабалӣ Турсунзода ба шореҳи варзиши АМИТ «Ховар» хабар дод.

Хотиррасон мешавем, ки Сомон Турсунзода дар мусобиқаи байналмилалӣ бо дастгирии Кумитаи кор бо ҷавонон ва варзиши назди Ҳукумати Ҷумҳурии Тоҷикистон иштирок намуд.

Моҳи апрели соли 2024 дар шаҳри Тошканди Ҷумҳурии Узбекистон Мусобиқаи байналмилалӣ оид ба гӯштини ҷудо байни наврасон – «Tashkent open judo kids cup ii» дар сатҳи баланд баргузор шуда буд, ки дар мусобиқа 800 варзишгар аз 8 давлат иштирок ва байни ҳам рақобат намуданд. Дар он варзишгари навраси тоҷик Сомон Турсунзода, ки дастпарвари «Клуби ҷудои Сомон» аст, дар вазни 26 кг бо шикаст додани 6 рақиб аз давлатҳои Қазоқистон, Қирғизистон, Узбекистон ва Озарбойҷон мақоми сеюмро гирифт.

Ёдовар мешавем, ки аввали моҳи апрели имсол Сомон Турсунзода дар Мусобиқаи байналмилалӣ оид ба гӯштини ҷудо «Dzyudo Termiz Open 2024» дар шаҳри Тирмизи Ҷумҳурии Узбекистон дар вазни то 26 кг бо мағлуб намудани рақибонаш аз Қазоқистон ва Узбекистон сазовори ҷойи аввал ва медали тилло шуд.

Бояд гуфт, ки варзишгари навраси тоҷик Сомон Турсунзода моҳи августи соли 2022 дар Мусобиқаи байналмилалӣ оид ба гӯштини ҷудо байни наврасон, ки дар шаҳри Тарази Ҷумҳурии Қазоқистон баргузор шуд, дар вазни то 23 кг медали тилло ба даст овард. Сомон Турсунзода то роҳ ёфтан ба марҳилаи ниҳоӣ варзишгарони Қазоқистон, Узбекистон ва Қирғизистонро мағлуб намуда, соҳиби медали тиллои мусобиқа гардид. Ҳамзамон аз ҷониби ҳайати доварони мусобиқа Сомон Турсунзода барои нишон додани маҳорати баланди техникӣ байни иштирокчиён варзишгари беҳтарин дониста шуда, бо диплом қадрдонӣ гардид.

Бояд ёдовар шуд, ки ин варзишгари наврасу бомаҳорати тоҷик ба синни хурд нигоҳ накарда, дар мусобиқаҳои зиёди байналмилалӣ иштирок намуда, Парчами Ҷумҳурии Тоҷикистонро борҳо баланд бардоштааст. Теъдоди медалҳои ӯ дар мусобиқоти ҳам дохилӣ ва ҳам хориҷӣ ба 141 адад мерасад.

Меҳрони ҚУРБОН,
АМИТ «Ховар»

АКС: АМИТ «Ховар»

Май 20, 2024 19:43

Хабарҳои дигари ин бахш

Варзишгарони Тоҷикистон дар Бозиҳои варзишии кишварҳои БРИКС – 2024 9 медал ба даст оварданд
ФУТБОЛ. Машғулиятҳои омӯзишӣ аз рӯйи барномаи иҷозатномаи «В» ба охир расид
ЧЕМПИОНАТИ ОСИЁ. Қаиқрони тоҷик Муҳаммадӣ Раҷабов бо медалҳои тилло ва нуқра ба Ватан баргашт
Бозингари дастаи «Истиқлол»-и Душанбе Рустам Ятимов расман ба дастаи «Ростов»-и Русия гузариш намуд
ҶОМИ ОСИЁ-2025. Моҳи сентябр марҳилаи интихобии мусобиқа баргузор мешавад
ҶОМИ ОСИЁ-2025. Дастаи наврасони Тоҷикистон дар гурӯҳи «J» қарор гирифт
Дар рӯзи аввалини бозиҳои БРИКС варзишгарони тоҷик 2 медали биринҷӣ ба даст оварданд
Ҳайати Тоҷикистон дар ифтитоҳи бозиҳои варзишии БРИКС 2024 дар шаҳри Қазон иштирок намуд
«ҶОМИ ҲИЗБИ ХАЛҚИИ ДЕМОКРАТИИ ТОҶИКИСТОН». Дар Хатлон мусобиқаи футбол оғоз гардид
ЧЕМПИОНАТИ ОСИЁ ОИД БА КУРАШ. Паҳлавонони тоҷик дар он соҳиби панҷ медал шуданд
ҶОМИ ҶАҲОН-2026. Имрӯз дастаи мунтахаби Тоҷикистон бо тими миллии Покистон бозӣ мекунад
Дар Душанбе давраи шаҳрии мусобиқаи хурди футбол барои дарёфти «Ҷоми Ҳизби Халқии Демократии Тоҷикистон» оғоз гардид