«ҶАҲОНИ ОЯНДА». Дар ин намоишгоҳи байналмилалӣ дар Душанбе беш аз 200 асари рассомони ҷавони Тоҷикистону Чин ба намоиш гузошта шуд

Июнь 28, 2024 10:08

ДУШАНБЕ, 28.06.2024 /АМИТ «Ховар»/. Беш аз 200 асари рассомони ҷавони Тоҷикистон ва Чин дар Намоишгоҳи байналмилалии санъати тасвирии наврасону ҷавонон, ки таҳти унвони «Ҷаҳони оянда» дар Осорхонаи миллии Тоҷикистон оғоз гардид, ба маърази тамошо гузошта шуд.

Тавре АМИТ «Ховар» бо истинод ба Осорхонаи миллии Тоҷикистон иттилоъ медиҳад, Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо сохторҳои дахлдори Ҷумҳурии Мардумии Чин аз созмондиҳандагони намоишгоҳи байналмилалии санъати тасвирии наврасону ҷавонон мебошанд.

Ҳадафи баргузории намоишгоҳ ҷалби ҷавонону наврасон ба соҳаи санъати тасвирӣ, ҳайкалтарошӣ, санъати ороишӣ- амалӣ -кулолгарӣ, заргарӣ, рассомӣ, таблиғу ташвиқ ва дастгирии истеъдодҳои наврас буда, барои боз ҳам рушди фарҳангу санъати ду давлати ба ҳам дӯсту ҳамҷавор заминаи мусоид фароҳам меорад.

Дар қисмати расмии ифтитоҳи намоишгоҳ сардори Раёсати маориф, фарҳанг ва иттилооти Дастгоҳи иҷроияи Президенти Ҷумҳурии Тоҷикистон Анвар Сафарзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Зулфиқор Гулаҳмадзода, Сафири Фавқулода ва Мухтори Ҷумҳурии Мардумии Чин дар Ҷумҳурии Тоҷикистон Тсзи Шумин ва намояндаи Дафтари иттилооти Шурои давлатии Чин Ли Юан сухан намуданд.

Таъкид гардид, ки наврасони боистеъдод неруи пешбарандаи ҷамъият, ояндаи миллат, манбаи илҳом ва умед барои ҷомеа буда, истеъдод ва дастовардҳои онҳо метавонанд ба фарҳанг, илм, варзиш ва дигар соҳаҳои муҳимми ҳаёт таъсири назаррас расонанд.

Гуфта шуд, ки Ҷумҳурии Мардумии Чин дар сиёсати хориҷии Ҷумҳурии Тоҷикистон яке аз давлатҳои муҳим маҳсуб ёфта, муносибатҳои дӯстӣ ва ҳамкории гуногунҷанбаи Тоҷикистону Чин дар шакли бисёрҷониба ба таври устувор рушд намуда истодааст.

Робитаи байни халқҳои тоҷику чин таърихи куҳан дошта, ҳанӯз аз замони Роҳи бузурги абрешим маншаъ мегиранд ва дар марҳилаи нав — тӯли беш аз се даҳсола аст, ки ботадриҷ густариш меёбанд.

Дар пешбурди самарабахши ин равандҳо нақши роҳбарони олимақом – Президенти Ҷумҳурии Тоҷикистон муҳтарам Эмомалӣ Раҳмон ва Раиси Ҷумҳурии Мадумии Чин ҷаноби Си Ҷинпин, ки иртиботи дӯстона доранд, басо муҳим мебошад.Зеро муколамаи доимии сатҳи олӣ заминаи устувори сиёсиро барои таҳкими муносибатҳои гуногунҷанбаи ҷонибҳо дар самтҳои гуногун, аз ҷумла дар соҳаи кор бо ҷавонон, фароҳам меоранд.

Намоишгоҳи байналмилалии санъати тасвирии наврасону ҷавонон таҳти унвони «Ҷаҳони оянда» дар Рӯзи Ваҳдати миллӣ, ки барои мардуми Тоҷикистон санаи муқаддас аст, оғоз ёфт ва то 28 июн идома меёбад.